Ordu.az xəbər verir ki, bu barədə Litva Prezidenti Gitanas Nauseda açıqlama verib.
Prezident bildirib ki, sifariş edilən maşınların təxminən 300 ədədinin 2030-cu ilə qədər təhvil verilməsi planlaşdırılır.
Məlumata görə, proqram çərçivəsində istehsal prosesinin müəyyən hissəsi Litva ərazisində həyata keçiriləcək. Bu qərarla Litva Finlandiyanın rəhbərlik etdiyi Common Armoured Vehicle System (CAVS) proqramına qoşulan sonuncu ölkə olub.
Hazırda “Patria” 6x6 platformasından Finlandiya, İsveç, Latviya, Danimarka, Norveç, Almaniya və Birləşmiş Krallıq istifadə edir. Bildirilir ki, maşınlar eyni zamanda Ukraynada da aktiv şəkildə istismar olunur. 936 maşınlıq sifarişin Litva ölçüsündə bir ölkə üçün olduqca böyük həcmdə olduğu qeyd edilir.
Mütəxəssislərin fikrincə, bu addım Rusiya-Ukrayna müharibəsindən sonra Baltik ölkələrində sürətlənən müdafiə investisiyalarının bir hissəsidir. Məlumata görə, Litva müdafiə xərclərini ÜDM-in 5 faizi səviyyəsinə çatdırmağı hədəfləyir və “Patria” proqramı ölkənin ən iri quru qoşunları modernizasiya layihələrindən biri hesab olunur.
Rusiya və Belarusla sərhədə malik olan Litva NATO üçün strateji əhəmiyyət daşıyan Suvalki dəhlizi səbəbindən öz zirehli quru qüvvələrini sürətlə gücləndirməyə çalışır. “Patria” 6x6 platforması şəxsi heyətin daşınması, komanda-idarəetmə, təxliyə, minaatan daşıyıcısı və atəş dəstəyi maşını kimi müxtəlif vəzifələr üçün istifadə oluna bilən modul konstruksiyaya malikdir.
Maşın amfibiya qabiliyyəti, yüksək yolsuzluq göstəriciləri və strateji hərəkətlilik imkanları ilə seçilir. Məlumata görə, platformanın Ukraynada əldə etdiyi əməliyyat təcrübəsi onun davamlılığı və sağqalma qabiliyyəti baxımından mühüm göstərici hesab olunur.
Litva Prezidenti Gitanas Nauseda bildirib ki, ölkə bu zirehli maşınların istehsal zəncirinə inteqrasiya oluna bilər. “Patria” şirkətinin Qorunan Mobillik Bölməsinin rəhbəri Yussi Yarvinen isə Litva sənayesi ilə uzun müddətdir əməkdaşlıq etdiklərini qeyd edib.
Onun sözlərinə görə, Litvanın CAVS proqramı çərçivəsində “Patria” 6x6 platformasını seçməsi şirkət tərəfindən böyük məmnunluqla qarşılanıb. Yarvinen vurğulayıb ki, Litva inkişaf, istehsal və texniki xidmət sahələrində texnologiya transferini həyata keçirmək üçün zəruri imkanlara malikdir.
Sevinc Əliyeva
Ordu.az
