Ordu.az xəbər verir ki, bu barədə Ermənistanın “Zham.am” nəşri yazıb.

Məqalədə qeyd olunur ki, hər il Nikol Paşinyan və ailə üzvləri Korrupsiyanın Qarşısının Alınması Komissiyasına əmlak və gəlirləri barədə bəyannamə təqdim edirlər.

Nəşrin bildirdiyinə görə, rəsmi məlumatlarda Paşinyanın adına nə daşınmaz, nə də daşınar əmlak göstərilir.

“Paşinyan hətta borcalan kimi göstərilir. Yəni kasıb adam yalnız maaşına ümid edir. Lakin bu, yalnız rəsmi məlumatlardır və Paşinyanın hesabat vermədən istifadə edə bildiyi büdcə vəsaitləri mövcuddur. Son 8 ildə Baş nazir Aparatının ehtiyacları üçün hər il təxminən 60-65 milyon dollar ayrılıb. Üstəlik, cüzi istisnalarla bu məbləğ ildən-ilə artıb”, - deyə nəşr bildirib.

Məqalədə qeyd olunur ki, 2025-ci ildə Baş nazir Aparatına dövlət büdcəsindən 24,3 milyard dram ayrılıb.

“Əgər həmin il dolların orta məzənnəsinin təxminən 385 dram olduğunu hesablasaq, deməli ötən il Paşinyanın aparatına büdcədən 63 milyon dollardan çox vəsait ayrılıb”, - deyə nəşr vurğulayıb.

“Zham.am” yazır ki, 2024-cü ildə də təxminən eyni həcmdə vəsait ayrılmışdı.

Nəşrə görə, 2026-cı ildə Baş nazir Aparatı üçün 25,804 milyard dram ayrılıb və artımın səbəbi kimi İrəvanda iri beynəlxalq tədbirlərin təşkili və laborator təhlükəsizliyi üzrə əlavə yoxlamalar göstərilib.

“Yəni bu il Paşinyanın aparatı təxminən 66 milyon dollar xərcləyəcək”, - deyə məqalədə bildirilir.

Müəllif bu məbləği digər ölkələrlə müqayisə edib.

“Məsələn, Paşinyanın aparatına İspaniya, İsveç, Belçika və Danimarka kral ailələrinin birlikdə xərclədiyindən daha çox vəsait sərf olunur. Bu, Paşinyanın özünü “kraldan da üstün” hesab etdiyini göstərir.

2025-ci il büdcəsinə əsasən Ermənistan Prezident Aparatına 1,6 milyard dram, parlamentə isə 7,07 milyard dram ayrılıb. Bu o deməkdir ki, Prezident Aparatı təxminən 4,1 milyon dollar, parlament isə 18 milyon dollar alıb. Paşinyan isə hesab edir ki, onun xərcləri parlamentdən 3,5 dəfə, Prezident Aparatından isə 16 dəfə çox olmalıdır”, - deyə nəşr vurğulayıb.

“Zham.am” iddia edir ki, Baş nazir Aparatının xərclərinin böyük hissəsi məxfi maddələr üzrə aparılır və qanuna görə hesabat verilmir.

Məqalədə 2025-ci ildə Nikol Paşinyanın beynəlxalq səfərləri üçün ayrılan vəsaitin əvvəlki illə müqayisədə iki dəfə artırıldığı da qeyd olunub.

Nəşrin yazdığına görə, 2024-cü il yanvarın 1-dən dekabrın 31-dək Baş nazir Aparatı 3 milyon 294 min 375 dram xərcləyib.

“Bu məbləğin 958 min 735 dramı gündəlik xərclərə, 2 milyon 335 min 640 dramı isə aviabiletlərə sərf olunub. Açıq büdcə maddələrinə baxıldıqda 63-66 milyon dolların yalnız cüzi hissəsinin real xərclərə getdiyi görünür. Əgər əməkhaqları da nəzərə alınsa, ümumi xərclər 66 milyon dolların yarısına belə çatmır”, - deyə məqalədə vurğulanıb.

Bununla yanaşı, nəşr sual verir ki, büdcənin qalan hissəsi hara xərclənib.

“Bu sualın cavabını hakimiyyət dəyişəndən və ictimaiyyət həmin büdcə maddələrini məxfilikdən çıxarandan sonra almaq mümkün olacaq”, - deyə məqalədə qeyd olunub.

“Zham.am” yazır ki, son 8 ildə Paşinyan və onun aparatı ümumilikdə təxminən 480-500 milyon dollar əldə edib və bunun ən azı yarısının necə xərcləndiyi ictimaiyyətə məlum deyil.

Nəşrin fikrincə, Paşinyan dövlət büdcəsinin demək olar bütün xərclərinə müdaxilə etdiyinə görə onun xəbəri olmadan böyük məbləğlərin xərclənməsi mümkün olmayıb.

“Bu isə həmin 240-250 milyon dolların Paşinyanın şəxsi maraqlarına xidmət etmiş ola biləcəyi barədə əsaslı şübhələr yaradır. Son 8 ildə Ermənistanın xarici borcu da təxminən 8 milyard dollar artıb. Lakin ictimaiyyət bu pulların hara xərcləndiyini görmür”, - deyə məqalədə qeyd olunub.

“Zham.am” hesab edir ki, yol tikintisi layihələri bu qədər böyük məbləğin xərclənməsini izah etmir.

“Qalan pullar haradadır, cənab Paşinyan?”, - deyə müəllif sual verib.

Məqalədə vurğulanır ki, Paşinyan maaşların, pensiyaların və mükafatların vergilər hesabına ödənildiyini deyir.

“Bəs Ermənistanın digər ölkələrdən və beynəlxalq qurumlardan kredit kimi aldığı həmin 8 milyard dollar hara xərclənib? Paşinyan şəxsən 8 milyard dollardan çox vəsaitin və əlavə 240 milyon dolların hara xərcləndiyi barədə hesabat verməlidir.

Bütün bunlardan հետո Paşinyanın başqalarının mülkiyyətini milliləşdirmək barədə təhdidləri ikiüzlü səslənir. Çünki Ermənistan cəmiyyətini maraqlandıran əsas məsələ odur ki, 2018-ci ilə qədər kasıb olan Paşinyan bu gün necə dollar milyarderi kimi qəbul olunur: Bu, reallıqdır”, - deyə nəşr qeyd edib.

Alpər Mövludoğlu
Ordu.az