Ordu.az xəbər verir ki, sözügedən sessiyada “Azərkosmos”un İdarə Heyətinin sədri Saməddin Əsədov, Türkiyənin ilk astronavtı, hərbi pilot Alper Gezeravcı və kosmosda dayanıqlıq və təhlükəsizlik, eyni zamanda kosmos bazar araşdırmaları şirkəti olan “Slingshot Aerospace”in sədrinin müşaviri Dana al-Salem çıxış ediblər.

Saməddin Əsədov kosmik fəaliyyət və innovasiyaların planetimizə təsirinə diqqət çəkərək, ilk baxışda uzaq olan kosmosun, yaxın olan Yerdəki problemlərin həllinə verdiyi töhfələri qeyd edib. Onun sözlərinə görə, innovasiyanın əsas mühərrikini elm və təhsil təşkil edir. İdarə Heyətinin sədri universitetlər, tədqiqat institutları və özəl şirkətlərin kosmik innovasiya ekosisteminin inkişafında birgə fəaliyyətin əhəmiyyətini vurğulayıb. “Onlar birgə tədqiqat aparır, texnologiyalar inkişaf etdirir və gələcək nəsil alim və mühəndisləri yetişdirirlər” – deyə Saməddin Əsədov bildirib. Azərkosmos da ölkəmizdə milli kosmik ekosistemin inkişafı istiqamətində öz səylərini davam etdirir.

Öz növbəsində, digər spikerlər də kosmik sahə və əlaqədar innovasiyaların gündəlik həyatımıza töhfə verə biləcəyi ideyaları vurğulayaraq, bu nəticələrə nail olunmasına dəstək ola biləcək startup ideyalarını qeyd ediblər.

Qeyd edək ki, panel müzakirəsinin sonunda tədbir iştirakçıları üçün Alper Gezeravcı ilə avtoqraf sessiyası keçirilib.

Ordu.az