Ordu.az xəbər verir ki, bu barədə Ermənistanın “Joğovurd” nəşri yazıb.
Nəşr qeyd edib ki, çox gərgin olan İsrail-Fələstin münasibətləri fonunda bir neçə gün əvvəl Ermənistan Fələstin dövlətini tanıdığını bəyan edib, bundan sonra İsrail Xarici İşlər Nazirliyi Ermənistanın Təl-Əvivdəki səfiri Arman Hakopyanı sərt töhmət vermək üçün söhbətə çağırıb.
“İsrail Baş nazirinin ofisi isə rəsmi olaraq Fələstin dövlətçiliyinin tanınması qərarının Ermənistan-İsrail münasibətlərinə mənfi təsir edəcəyini açıqlayıb. Məlumata görə, ötən gün İrəvanda, daha dəqiq desək, “Mariot” otelində İsrailin Müstəqillik Gününə həsr olunmuş tədbir olmalı idi, tədbirə hökumətin yüksək rütbəli məmurları da dəvət olunmuşdu. Tədbir gözlənilmədən ləğv edilib. Qeyd edək ki, bir neçə gün əvvəl Nikol Paşinyan Aleksandr Lukaşenkonun bu ölkənin prezidenti olduğu müddətdə özünün və Ermənistandan hansısa başqa rəsminin Belarusa səfər etməyəcəyini açıqlaması ilə Belarusla növbəti qalmaqal yaradıb. Bütün bunları nəzərə alsaq, qeyd edə bilərik ki, Nikol Paşinyan hökuməti nəyin bahasına olursa-olsun Türkiyə və Azərbaycanla münasibətləri tənzimləməklə yanaşı, digər ölkələrlə də münasibətləri korlamaq öhdəliyinə sadiqdir”, - deyə nəşr bildirib.
Alpər Mövludoğlu
Ordu.az