Ordu.az xəbər verir ki, “Gideon” adlandırılan tanker təyyarəsi 2026-cı il mayın 27-də “Nevatim” Hərbi Hava Bazasına çatdırılıb.
Məlumata görə, yeni tanker təyyarəsi xüsusilə İran istiqamətində həyata keçirilən uzunmənzilli zərbə əməliyyatlarında İsrailin müstəqil fəaliyyət imkanlarını əhəmiyyətli dərəcədə artıracaq.
Bildirilib ki, 2026-cı ilin fevral-mart aylarında İrana qarşı həyata keçirilən hava əməliyyatları zamanı tanker təyyarələrinin sayı İsrail üçün əsas məhdudlaşdırıcı amillərdən biri olub.
Həmin əməliyyatlarda İsrail qırıcılarının təxminən 8 min 500 uçuş həyata keçirdiyi və ballistik raket buraxılış qurğularına, hava hücumundan müdafiə sistemlərinə, komanda mərkəzlərinə və nüvə infrastrukturu ilə əlaqəli obyektlərə zərbələr endirdiyi qeyd olunub.
Hədəflərin İsraildən 1500-2000 kilometr məsafədə yerləşməsi səbəbindən F-35I “Adir”, F-15I “Ra’am” və F-16I “Sufa” qırıcılarının havada yanacaq doldurulmasına ciddi ehtiyac duyduğu vurğulanıb.
“Boeing 767” platforması əsasında yaradılmış KC-46A “Pegasus” tanker təyyarələri İsrailin uzun illər istifadə etdiyi “Boeing 707 Re’em” tanker parkını əvəz edəcək.
Məlumata görə, köhnə tanker təyyarələri struktur yorğunluğu, yüksək texniki xidmət tələbi, aşağı yanacaq ötürmə qabiliyyəti və ehtiyat hissələri çatışmazlığı səbəbindən əməliyyat imkanlarını məhdudlaşdırırdı.
KC-46A təyyarələrinin isə daha böyük yanacaq ötürmə həcmi, uzun müddət havada qalma qabiliyyəti və çoxməqsədli istifadəsi İsrail Hərbi Hava Qüvvələrinin çevikliyini artıracaq.
Təyyarənin 200 min-212 min funt arasında ötürülə bilən yanacaq daşıya bildiyi, 16 saatdan artıq havada qala bildiyi, əlavə havada yanacaq doldurulması ilə isə bu müddətin 24 saatı keçə bildiyi bildirilib.
İsrailin 2021-ci ildə təsdiqlədiyi proqram çərçivəsində ümumilikdə səkkiz KC-46A tanker təyyarəsinin alınmasına icazə verilib. “Boeing” şirkəti 2022-ci ildə ilk dörd tanker üçün 930 milyon dollar dəyərində müqavilə əldə edib.
Hazırda altı təyyarədən ibarət parkın formalaşdırılması nəzərdə tutulur və ikinci KC-46A tanker təyyarəsinin yaxın aylarda İsrailə təhvil veriləcəyi gözlənilir.
Sevinc Əliyeva
Ordu.az
