Ordu.az xəbər verir ki, bu barədə ABŞ Ordusunun Müqavilələr Komandanlığı məlumat yayıb.
Yeni razılaşma ilə proqramın ümumi müqavilə dəyəri təxminən 78 milyon dollara çatıb.
Müqaviləyə əsasən işlər ABŞ-nin Alabama ştatının Hantsvill şəhərində yerləşən müəssisələrdə həyata keçiriləcək və 2029-cu il dekabrın 31-dək tamamlanacaq. Layihənin maliyyələşdirilməsi ABŞ-nin Xarici Hərbi Satışlar (FMS) proqramı çərçivəsində Polşa tərəfindən təmin ediləcək.
Polşanın WISLA hava və raket hücumundan müdafiə proqramı “Patriot” hava hücumundan müdafiə sistemi ilə “Northrop Grumman” tərəfindən hazırlanmış IBCS komanda-idarəetmə infrastrukturunu birləşdirir.
IBCS müxtəlif radarlar, sensorlar və ələkeçirmə sistemlərindən daxil olan məlumatları vahid şəbəkədə birləşdirərək ümumi hava mənzərəsi yaradır. Bunun sayəsində hər hansı sensor tərəfindən aşkarlanan hədəf şəbəkədəki başqa bir ələkeçirmə sistemi tərəfindən məhv edilə bilir.
Sistem həmçinin radarların radioelektron mübarizə vasitələri ilə sıradan çıxarıldığı və ya fəaliyyətinin pozulduğu hallarda digər sensorlardan alınan məlumatlar əsasında işləməyə davam edə bilir.
Polşa hazırda IBCS sistemindən tam əməliyyat qabiliyyəti ilə istifadə edən ilk NATO ölkəsidir.
Rusiya ilə Kalininqrad bölgəsi və Belarusla həmsərhəd olan Polşa son illərdə hava və raket hücumundan müdafiə imkanlarına yatırımlarını sürətlə artırıb. “Patriot” sistemləri və IBCS infrastrukturu ölkənin ballistik raketlərə, qanadlı raketlərə və hava təhdidlərinə qarşı qurduğu çoxqatlı müdafiə arxitekturasının əsas elementləri hesab olunur.
Yeni müqavilə komanda-idarəetmə proqram təminatının yenilənməsini, rabitə infrastrukturunun saxlanılmasını, təhdid məlumat bazalarının inkişaf etdirilməsini və sistemin əməliyyat imkanlarının qorunmasını əhatə edir.
“Northrop Grumman” tərəfindən hazırlanmış IBCS sistemi artıq ABŞ Ordusunda da istifadə olunur. Polşanın bu sistemi erkən mərhələdə silahlanmaya qəbul etməsi NATO-nun şərq cinahında hava və raket hücumundan müdafiə imkanlarını əhəmiyyətli dərəcədə artırıb.
Əlavə 31 milyon dollarlıq müqavilə ilə Polşanın “Patriot” və IBCS əsaslı hava hücumundan müdafiə şəbəkəsinin ən azı 2029-cu ilə qədər müasir və əməliyyat vəziyyətində saxlanılması planlaşdırılır.
Sevinc Əliyeva
Ordu.az
