İsrailin “Aslan Milləti” əməliyyatı İranın nüvə və uzun mənzilli silah qabiliyyətini zəiflətməyi hədəfləyir və gecə vaxtı genişmiqyaslı hücumla başlayıb. Bu zərbələr arasında İranda yerləşdirilmiş agentlər tərəfindən buraxılmış pilotsuz uçuş aparatları və raketlər də yer alıb. Bu barədə İsrailin “N12” media orqanı adının çəkilməsini istəməyən təhlükəsizlik mənbəsinə istinadən məlumat verib.

Detalların məhdud olması başadüşüləndir, lakin hesabatdan aydın olur ki, MOSSAD bu əməliyyatı aylarla planlaşdırıb və İrana agentlər yerləşdirib. Həmin agentlər kamikadze tipli PUA-lar və tank əleyhinə idarəolunan raketlərdən istifadə edərək İranın hava hücumundan müdafiəsini sıradan çıxarmaq və genişmiqyaslı hücuma zəmin yaratmaq məqsədilə ölkə daxilində gizli PUA bazası qurublar.

Təhlükəsizlik mənbəsi “N12”yə bildirib: “Agentlər xüsusi silahları geniş şəkildə ölkəyə daxil edərək yerləşdirib və dəqiq və effektiv şəkildə hədəflərə qarşı istifadəsini təmin ediblər”.

İddialara görə, İranın daxilindəki İsrail operativləri tərəfindən hədəf alınan obyektlərdən biri Tehranın yaxınlığındakı hava hücumundan müdafiə mövqeyi olub. Əməliyyatdan bir qədər əvvəl həmin ərazidə yerləşdirilmiş “yer-hava” tipli raket qurğularına İsrail PUA-ları ilə zərbələr endirilib. Bu, həmçinin hücum zamanı İranın hava hücumundan müdafiə sistemlərinin passiv qalmasını izah edir.

Eyni vaxtda İsrail Hərbi Hava Qüvvələri (HHQ) də düşmən hava hücumundan müdafiə sistemlərinin basdırılması və məhv edilməsi (SEAD/DEAD) əməliyyatları həyata keçirib və onlarla radar və raket qurğusunun məhv edildiyini bildirib.


İsrail rəsmilərinin məlumatına görə, təxminən 200 HHQ təyyarəsi əməliyyatda iştirak edib və 330-a yaxın döyüş sursatı buraxılıb. Bu hücumlarda əsasən uzaq məsafədən zərbə endirən silahlardan istifadə edilib. Lakin İranın yerüstü hava hücumundan müdafiə sistemlərinin sıradan çıxarılması təyyarələrin atdığı sursatların hədəfə çatma ehtimalını artırıb.

İsrail Müdafiə Nazirliyinin yaydığı video və şəkillərdə İsrail Hərbi Hava Qüvvələrinə məxsus F-16 və F-35 qırıcıları İran hədəflərinə hücum edərkən göstərilir. F-16 qırıcıları “Small Diameter Bombs” (SDB) və “Popeye” raketləri ilə yanaşı məlumat ötürülməsi üçün nəzərdə tutulan kapsulları da daşıyır.

İran daxilindən buraxılan PUA-lar İsrailin strateji obyektləri və mülki əhalisi üçün təhlükə yarada biləcək “yer-yer” tipli raket buraxılış qurğularına yönəldilib.

İsrailin PUA və raketlərinin İrana necə gətirildiyi və necə gizlədildiyi hələlik tam məlum deyil. Lakin “N12”nin məlumatına görə, MOSSAD bəzi PUA və raket bazalarını açıq şəkildə İranın hava hücumundan müdafiə sistemlərinin yaxınlığında yerləşdiriblər.

Aşağıdakı videoda iddia olunur ki, MOSSAD agentləri Tehranın yaxınlığında yerləşərək dron və ya raket buraxıb:

Kadrlarda İsrail xüsusi təyinatlılarının İranda yerləşərək “Rafael Spike” dəqiq idarə olunan raketlərindən istifadə etdiyi göstərilir. Xüsusilə “Spike NLOS” (Non-Line-Of-Sight) versiyası bu cür missiyalar üçün ideal silahdır. Bu raketlər sipərin arxasından atıla bilir və həm “at və unut”, həm də operator tərəfindən yönləndirmə rejimində işləyə bilir. Beləliklə, zərbə endirmədən əvvəl hədəfi dəqiq izləmək imkanı yaradır.

Əməliyyat uzun illər hazırlanıb. MOSSAD və İsrail Müdafiə Qüvvələri (IDF) İranın nüvə proqramı ilə bağlı şəxslər və təhlükəsizlik rəhbərlərinin siyahısını tərtib ediblər. Bu əvvəlcədən planlaşdırılmış hücumda həmin şəxslərin bəziləri öz evlərində zərərsizləşdirilib, nüvə infrastrukturu və strateji raket sistemləri hədəfə alınıb.

İranın dövlət mediasının verdiyi məlumata görə, bu hücumlarda İnqilab Keşikçiləri Korpusunun rəhbəri general Hüseyn Səlami, Silahlı Qüvvələrin Baş Qərargah rəisi general Məhəmməd Baqeri, “Xatəmül-Ənbiyə” Qərargahının rəhbəri general Qulaməli Rəşid və 6 nüvə alimi, o cümlədən 2011-2013-cü illərdə İran Atom Enerjisi Təşkilatının rəhbəri olmuş Firudin Abbasi həlak olub.

İranın paytaxtı Tehran daxilindəki hücumdan sonra çəkilmiş fotolarda tüstü qalxan yerlər görünür.

İsrailin təhlükəsizlik mənbəsi “N12”yə bildirib: “Bu kampaniya uzun müddət planlaşdırılıb və cəsarətli, ağıllı planlama ilə yanaşı, müasir yanaşma və strategiyalar tələb edib. Bütün əməliyyatlar dəqiq tədqiqat və kəşfiyyat, qabaqcıl texnologiyalar və Tehranın mərkəzində və İranda gizli şəkildə fəaliyyət göstərən geniş xüsusi təyinatlı qüvvələrin idarə olunmasını tələb edib”.


Belə gizli PUA və raket hücumlarına son ayların nümunəsi olaraq Ukraynanın “Operation Spiderweb” əməliyyatı göstərilə bilər. Bu əməliyyatda Rusiya ərazisinə yük maşınlarında gizlədilmiş PUA-larla zərbələr endirilmişdi. Bu, strateji hədəflərə qarşı uzun müddətli planlaşdırılmış və koordinasiya edilmiş hücumlara bənzəyir.

Məlumata görə, İsrail həmçinin İranda nəqliyyat vasitələrində yerləşdirilmiş silahlardan istifadə edib. Bu vasitələrdə “mürəkkəb texnologiyaların” quraşdırıldığı bildirilir.

İsrail daha əvvəl də İranda daxildən kənar hücumlar həyata keçirmişdi. 2020-ci ildə İranın əsas nüvə alimi Möhsün Fəxrizadənin öldürülməsi zamanı MOSSAD tərəfindən uzaqdan idarə olunan və ya avtomatlaşdırılmış silah sistemindən istifadə olunub. “New York Times” bu hücumun “təkmilləşdirilmiş süni zəka ilə idarə olunan silah” vasitəsilə həyata keçirildiyini yazmışdı.


Bununla belə, bu cür gizli hücumların tez-tez təkrarlanması çətin ola bilər. İran hökuməti artıq ölkə daxilində belə bazaların və hücrələrin axtarışına başlaya bilər.

Yaxın vaxtlarda İsrail daha ənənəvi hücum üsullarına qayıda bilər. Lakin kiberhücumlar sahəsində də geniş imkanlara malikdir. Bu sahədə İsrail hava hücumundan müdafiə sistemlərini sıradan çıxarmaq üçün qaydaları özü yaradıb.

İsrailin baş naziri Benyamin Netanyahunun sözlərinə görə, əməliyyat “İsrailin sağ qalması üçün İran təhlükəsini geri çəkməyə” yönəlib və “bir neçə gün davam edəcək”.

Netanyahu televiziyada verdiyi açıqlamada bildirib: “İranın nüvə zənginləşdirmə proqramının əsasına zərbə vurduq. İranın nüvə silahı yaratmaq planlarını hədəfə aldıq. “Natanz”da yerləşən əsas obyektləri, habelə “İranın ballistik raket proqramının əsasını” vurduq”.

İranın ali dini lideri Əli Xameneyi İsrailə “şiddətli cəza” veriləcəyini deyib. Bu səhər İran artıq İsrailə qarşı təxminən 100 pilotsuz uçuş aparatı buraxıb. Hər iki tərəfdən daha çox zərbə gözlənilir. Netanyahu İsrail vətəndaşlarının uzun müddət sığınacaqlarda qalmalı ola biləcəyini bildirib.

Dəyanət Ağalarlı
Ordu.az