Ordu.az xəbər verir ki, bunu erməni hərbi ekspert David Camalyan Respublika Gününə həsr olunmuş hərbi paradı şərh edərkən deyib.

Camalyan paradla bağlı ümumən ciddi iradlar səsləndirib.

“Bu, parodiyaya bənzəyən bir tədbir idi. Bunu ağrıyla deyirəm, çünki ordunun irəliləməsi, ordunun uğuru hər bir azərbaycanlı üçün, hər şeydən asılı olmayaraq, böyük nailiyyət kimi görünməlidir. Amma burada biz ucuz piarı görürük. 2020-ci ildən bu günə qədər İlham Əliyevdən qorxaraq heç bir təlim keçirməyən hakimiyyət birdən-birə seçkilər öncəsi səs qazanmaq üçün şübhəli hərbi-texniki fəallıqla əldə etdiyi, doğrudan da şübhə doğuran silahları nümayiş etdirməyə çalışır”, - deyə erməni ekspert bildirib.

Camalyan silah alışlarının bir sıra praktiki problemlərinə də diqqət çəkib.

“Ölkəmiz üçün əsas problem təkcə silah almaq deyil, həmin silahların və onların sursatının ölkəyə çatdırılmasıdır. Bunun üçün iki yol var: Gürcüstan və İran vasitəsilə. Fransadan alınan, məsələn, CAESAR sistemi keyfiyyətli silahdır, amma o, yalnız Gürcüstan üzərindən gələ bilər. Biz isə bilirik ki, Gürcüstan 2020-ci ildə bizim üçün hava məkanını bağlayıb. Türkiyə-Azərbaycan ittifaqı Gürcüstanda çox güclü təsirə malikdir. Buna görə də mümkündür ki, Azərbaycanla qarşıdurma yarandığı halda Gürcüstan yenidən hava məkanını bağlasın. Onda Fransadan alınan silah üçün sursat gəlməyəcək, yəni həmin artilleriya sistemi üçün mərmi olmayacaq”, - deyə o vurğulayıb.

Erməni ekspertin sözlərinə görə, Fransa istehsalı olan silah və sursat İran ərazisindən də daşına bilməz, çünki İran-NATO-ABŞ qarşıdurmasının gələcəkdə daha da kəskinləşmə ehtimalı var.

“Bu partiyanın isə Aliev tərəfindən sadəcə gəlib çatmasına icazə verilib ki, Nikol öz reytinqini düzəltməyə çalışsın. Başqa heç nə”, - deyə Camalyan bildirib.

O, fransız silahlarının bəzi nümunələrini keyfiyyət baxımından müsbət qiymətləndirsə də, onların qiymətini ciddi problem sayıb.

“Eyni sistemləri Rusiyadan daha ucuz almaq olardı”, - deyə erməni ekspert qeyd edib.

Camalyan hind silahlarının da keyfiyyətini şübhə altına alıb.

“Misal üçün, elə silahlar alıblar ki, həmin hava hücumundan müdafiə sistemləri həm Hindistan ordusunda, həm də Ermənistan Silahlı Qüvvələrində eyni vaxtda tətbiq olunur. Maraqlısı odur ki, Hindistan bu sistemlərdən Pakistanla son gərginlik zamanı istifadə etdiyini və tətbiqin səmərəli olduğunu açıqladı. Amma mən uzun axtarışdan sonra belə bunun faktlarla təsdiqləndiyini görmədim. Həmin hava hücumundan müdafiə sistemlərinin hansısa hədəfi vurduğuna dair rəsmi və təsdiqlənmiş sübut yoxdur”, - deyə o bildirib.

Rus alternativinin də problemli olması barədə iddialara münasibət bildirən erməni ekspert belə cavab verib:

“Bu, açıq-aşkar yalandır. Çünki təxminən bir il əvvəl özləri bəyan etmişdilər ki, Rusiyadan silah partiyası gəlib çatıb. Görünür, söhbət hava hücumundan müdafiə sistemlərindən gedirdi. Bəli, Rusiya hərbi-sənaye kompleksi Ukrayna ilə bağlı vəziyyətə görə həddindən artıq yüklənmişdi və bəzi texniki gecikmələr ola bilərdi. Amma belə hallar həmişə olub və sonda biz sifariş etdiyimiz silahı almışıq. Onlar da alıblar və sonra rus silahının gəlib çatdığını bildiriblər. Deməli, “pulu veriblər, silah gəlməyib” tezisi yalandır”.

Camalyan bu gün meydanda nümayiş etdirilən TOS sistemləri ilə bağlı da ehtimallar səsləndirib.

“Burada iki ehtimal var: ya bu sistemlər hələ Paşinyan hakimiyyətə gəlməmişdən əvvəl, yəni Serj Sarkisyan dövründə alınmış partiyadır, ya da son vaxtlar gəlib çatıb. Əgər son vaxtlar gəlibsə və bu, indiki hakimiyyət dövründə baş veribsə, onda bir daha sübut olunur ki, “pulu veriblər, silah almayıblar” iddiası yalandır”, - deyə o qeyd edib.

Silahlanmanın diversifikasiyası ilə bağlı suallara cavab verən erməni hərbi ekspert bildirib ki, diversifikasiya özü-özlüyündə lazımlıdır, amma bu, Rusiya ilə əməkdaşlığın qırılması hesabına olmamalıdır.

“İstənilən dövlətin hərbi texnika əldə etməklə bağlı bir neçə etibarlı istiqaməti olmalıdır. Rusiyanın hərbi-sənaye kompleksi ilə əməkdaşlıq da, təbii ki, diversifikasiyanı istisna etmir. Əvvəllər də belə olub. Məsələn, Rusiya ilə paralel olaraq NATO üzvü olan Polşa ilə “Lyubava-Armeniya” şirkəti vasitəsilə modernizasiya proqramları çərçivəsində əməkdaşlıq edirdik. O şirkət isə Paşinyan dövründə bağlandı”, - deyə Camalyan bildirib.

Onun fikrincə, hazırkı hakimiyyət hərbi-texniki əməkdaşlığı diversifikasiya etmək adı altında Rusiya ilə əlaqələri qırır.

“Bunun sifarişi və göstərişi onların Qərb himayədarlarından gəlir. Əvəzində isə hər tərəfdən silah almağa çalışırlar. Bəli, bizdə silah almaq üçün müxtəlif mənbələr olmalıdır, amma bu, qarşıdurma məntiqi ilə yox, tamamlayıcı məntiqi ilə olmalıdır”, - deyə ekspert vurğulayıb.

Camalyan gələcəkdə yeni hakimiyyətlərin daha sağlam yanaşma ilə hərəkət edəcəyini bildirib.

“Rusiyayla müttəfiqlik münasibətlərini yeni keyfiyyətə daşıdıqdan sonra sabit və etibarlı təchizat mümkün olacaq. Eyni zamanda digər ölkələrlə də tamamlayıcı münasibətlər qurulmalıdır. Hindistanla da əməkdaşlıq perspektivi görürəm, amma tamamlayıcı mövqedən”, - deyə o əlavə edib.

Erməni ekspert sonda diqqətə çatdırıb ki, alınmış silahlar 2024-cü ildən etibarən mərhələli şəkildə çatdırılsa da, onların döyüş şəraitinə yaxın mühitdə sınaqdan keçirilməsi üçün hələ bir dənə də olsun təlim keçirilməyib.

Alpər Mövludoğlu
Ordu.az