Ukraynadakı müharibə Rusiya Silahlı Qüvvələrinin yüksək rütbəli zabitləri üçün xüsusilə ölümcül olmağa davam edir. Ukrayna şəhərlərinə raket zərbələrinin endirilməsində mühüm rol oynayan yüksək rütbəli rus zabiti bu həftə Moskvada müəmmalı şəkildə öldürülüb. Böyük ehtimalla bu hadisənin arxasında Ukrayna xüsusi xidmət orqanlarının əməkdaşları dayanır.
Daha bir rus zabiti öldürüldü
Rusiya Müdafiə Nazirliyinin Baş Raket və Artilleriya İdarəsinin yüksək vəzifəli rəsmisi polkovnik Damir Davıdov çərşənbə axşamı səhər Moskva vaxtı ilə təxminən saat 05:30-da Balaşixa şəhərində avtomobilə yerləşdirilmiş partlayıcı qurğunun işə düşməsi nəticəsində həlak olub.
Hadisədən sonra Rusiya İstintaq Komitəsi bildirib ki, BMW X3 markalı avtomobil yaşayış binasının yaxınlığında hərəkətdə olarkən partlayıcı qurğu işə salınıb. Davıdov əvvəlcə rus hərbçiləri və onların ailələri üçün tikilmiş çoxmərtəbəli yaşayış binalarının yerləşdiyi Aviatorov rayonuna doğru hərəkət edirdi.
Rusiyanın ASTRA mətbuat xidmətinin yaydığı məlumata görə, İstintaq Komitəsi bildirib: “Avtomobilin sürücüsü çoxsaylı xəsarətlər alıb və hadisə yerində ölüb”.
Rusiyanın daxili təhlükəsizlik və kəşfiyyat xidməti olan Federal Təhlükəsizlik Xidməti (FTX) hadisə ilə bağlı cinayət işi açıb.
Davıdovun ölümü ilə bağlı Ukrayna tərəfindən rəsmi açıqlama verilməsə də, hücumun arxasında Ukrayna Təhlükəsizlik Xidmətinin (UTX) xüsusi əməliyyat bölməsinin dayandığı ehtimal edilir.
Həqiqətən də qətlin həyata keçirilmə üsulu, səhər tezdən qurbanın yaşayış yerinin yaxınlığında avtomobil partlayışının törədilməsi Ukrayna xüsusi xidmət orqanlarının əvvəlki əməliyyatlarının xarakterinə tam uyğun gəlir.
Davıdov niyə hədəfə çevrilmişdi?
Davıdovun rəhbərlərindən biri olduğu Baş Raket və Artilleriya İdarəsi raket və artilleriya sursatlarının istehsalı və təchizatına cavabdehdir.
Kamikadze tipli pilotuz uçuş aparatları ilə yanaşı, artilleriya döyüş meydanında ən ölümcül silah sistemlərindən biridir. Bu iki silah növü birlikdə münaqişə zamanı qeydə alınan ümumi itkilərin 85 faizindən çoxuna səbəb olub. Ballistik və qanadlı raketlər də yüksək dağıdıcı gücə malikdir və Rusiya ordusu onlardan əsasən Ukraynanın şəhər mərkəzlərinə və kritik infrastrukturuna qarşı istifadə edir. Bu zərbələr çox vaxt fərq qoyulmadan endirilir və mülki əhali arasında ciddi itkilərə səbəb olur.
Demək olar ki, Davıdovun qətlə yetirilməsinə səbəb olan əsas amil məhz raket müharibəsinin bu tərəfi və onun həmin fəaliyyətlə əlaqəsi olub.
Ukraynalı sui-qəsdçilər Rusiyanın daxilində cəzasız şəkildə fəaliyyət göstərirlər
Davıdovun öldürülməsi Ukraynaya qarşı genişmiqyaslı işğal başlayandan sonra Rusiya ərazisində yüksək rütbəli rus hərbçilərinə qarşı həyata keçirilmiş beşinci belə hadisədir. Müharibə ərzində onlarla rus generalı və yüksək rütbəli zabit də öldürülüb. Onların əksəriyyəti ön cəbhə yaxınlığında həlak olub.
Döyüş meydanından yüzlərlə kilometr uzaqda yerləşməsinə baxmayaraq, Rusiya paytaxtı yüksək rütbəli rus zabitləri üçün xüsusilə təhlükəli məkana çevrilib. 2024-cü il dekabrın 17-də general-leytenant İqor Kirillov yaşadığı binadan çıxarkən partlayış nəticəsində öldürülüb. O, Rusiyanın nüvə, bioloji, radioloji və kimyəvi müdafiə qoşunlarının rəisi idi.
Daha sonra, 2025-ci ilin aprel ayında Rusiya Silahlı Qüvvələri Baş Qərargahının Baş Əməliyyat İdarəsinin rəis müavini general-leytenant Yaroslav Moskalik çərşənbə axşamı Davıdovun öldürüldüyü yerdən təxminən bir kilometr məsafədə qətlə yetirilib. Moskalik də avtomobilinin yaxınlığından keçərkən partlayış nəticəsində həlak olub. O, müharibə dövründə öldürülən ən yüksək rütbəli rus zabitlərindən biri hesab olunur.
Kiyev həm Kirillovu, həm də Moskaliki hərbi cinayətlərdə, o cümlədən Ukrayna hərbçilərinə qarşı kimyəvi silahların tətbiqinə icazə verməkdə və mülki əhalinin bombalanmasında ittiham edirdi. Çərşənbə axşamı baş vermiş hücum göstərir ki, rus hərbi personalı hətta döyüş meydanından çox uzaqda belə son dərəcə qeyri-sabit təhlükəsizlik mühiti ilə üzləşir.
Sevinc Əliyeva
Ordu.az
