Ordu.az xəbər verir ki, təxminən 284 milyon dollar dəyərində olan paket indiyədək Avropa ölkələrinin Ukraynaya təqdim etdiyi ən diqqətçəkən uzaqmənzilli sursat dəstəklərindən biri hesab olunur.
Niderland hökuməti ötən həftə keçirilən mətbuat konfransında bu sistemləri Pilotsuz Uçuş Aparatı (PUA) kimi təqdim etsə də, Ukraynanın müdafiə naziri Mixaylo Fedorov sonradan təhvil veriləcək sistemlərin qanadlı raketlər olduğunu açıqlayıb.
Təhvil veriləcək sistemlər Niderlandın Hengelo şəhərində fəaliyyət göstərən Destinus şirkəti tərəfindən hazırlanmış “Ruta Block 2” qanadlı raketlərindən ibarətdir.
Şirkətin “cruise system” adlandırdığı “Ruta Block 2” əvvəlki “Block 1” variantı ilə müqayisədə həm uçuş məsafəsi, həm də daşıdığı döyüş başlığı baxımından əhəmiyyətli dərəcədə təkmilləşdirilib.
700 kilometrdən artıq uçuş məsafəsinə malik olan “Ruta Block 2” 250 kiloqram döyüş başlığı daşıyır, relyefi izləyərək çox aşağı hündürlükdə uça bilir və süni zəka dəstəkli hədəf tanıma və naviqasiya sistemi sayəsində strateji hədəflərə yüksək dəqiqliklə zərbə endirmək qabiliyyətinə malikdir.
Bu imkanları sayəsində sistemin komanda mərkəzləri, hava bazaları, sursat anbarları və müdafiə sənayesi müəssisələri kimi strateji obyektlərə qarşı dəqiq zərbə əməliyyatlarında istifadə olunması planlaşdırılır.
Niderlandın müdafiə naziri Dilan Yeşilgöz ötən həftə Haaqada Ukraynanın müdafiə naziri Mixaylo Fedorovu qəbul edib. Hər iki nazir daha sonra Destinus şirkətinin Hengelodakı istehsal müəssisəsini ziyarət edərək “Ruta Block 2”nin istehsal prosesi ilə tanış olublar.
Lakin səfərdən sonra keçirilən mətbuat konfransında Dilan Yeşilgöz Ukrayna üçün “Niderland sənayesindən PUA-ların satın alınacağını” bildirib. Hansı sistemlərin tədarük ediləcəyi ilə bağlı suallar isə cavabsız qalıb.
Bunun əksinə olaraq Mixaylo Fedorov NATO-nun mənzil-qərargahında keçirdiyi çıxış zamanı Niderlandın Ukraynaya 700 ədəd qanadlı raket verəcəyini açıqlayıb və təhvil veriləcək sistemlərin “Ruta Block 2” olduğunu təsdiqləyib.
Ukraynalı müdafiə rəsmisi Ruta ailəsinə məxsus raketlərin daha əvvəl də Ukraynaya çatdırıldığını və onların Rusiyanın dərinliklərində yerləşən yüksək əhəmiyyətli strateji hədəflərə qarşı əməliyyatlarda fəal istifadə edildiyini bildirib.
Onun sözlərinə görə, əvvəlki nəsil Ruta Block 1 təxminən 300 kilometr uçuş məsafəsinə və 150 kiloqram döyüş başlığına malik idi. Bu səbəbdən sistem “mini qanadlı raket” və ya “PUA-raket” kimi təsnif edilirdi.
Yeni hazırlanmış “Ruta Block 2” isə daha böyük döyüş başlığı və 700 kilometri aşan uçuş məsafəsi ilə platformanın əməliyyat imkanlarını əhəmiyyətli dərəcədə artırır.
Destinus şirkəti Ruta ailəsinin inkişafı üzərində işləri də davam etdirir.
Şirkətin hazırladığı “Ruta Block 3” variantının ilk sınaq uçuşunun gələn il keçirilməsi planlaşdırılır. Açıqlanan məlumata əsasən, yeni variantın 2 min kilometrdən artıq uçuş məsafəsinə malik olması nəzərdə tutulur.
Bu xüsusiyyətləri sayəsində Ruta ailəsinin gələcəkdə Avropada hazırlanmış ən uzaqmənzilli qanadlı raket platformalarından birinə çevriləcəyi gözlənilir.
Sevinc Əliyeva
Ordu.az
