Ordu.az xəbər verir ki, bunu erməni politoloq Hakob Badalyan yazıb.

“Neft qiymətlərinin artması və bu tendensiyanın davam etməsi. Bundan fayda əldə edənlər: Rusiya və ABŞ. Zərər görənlər: Səudiyyə Ərəbistanı istisna olmaqla Körfəz ərəb ölkələri, Çin və Hindistan. Çinlə bağlı böyük həcmdə ehtiyatda saxlanılan neftdən danışılır ki, bu da Pekinə müəyyən təhlükəsizlik yastığı təmin edə bilər. Eyni zamanda həm Hindistan, həm də Çin üçün sərfəli qiymətlə tədarükçü əlbəttə ki, siyasi və ya hərbi-siyasi, texnoloji “bonuslar” hesabına Rusiya ola bilər. Ən çox zərər çəkən isə Avropadır, enerji daşıyıcılarının qiymətlərinin artmasının yeni dalğası onun üçün yeni iqtisadi şokun səbəbi olacaq.

Körfəz ərəb ölkələrinin imicinin nəzərəçarpacaq dərəcədə zəifləməsi. Bu ölkələr onilliklər boyu özlərini sakit, sabit və təhlükəsiz məkan kimi təqdim edib, qlobal qarışıqlıq şəraitində balanslı davranış sərgiləyə bilən aktorlar kimi mövqe tutublar. Bu isə biznes baxımından onların cəlbediciliyinin ən vacib şərtlərindən biri olub. Hazırda isə bu imic ciddi şəkildə sarsılıb”, - deyə o qeyd edib.

Badalyan bildirib ki, ABŞ-də bir tərəfdən neft-qaz və hərbi-sənaye oyunçularının ruh yüksəkliyi, digər tərəfdən isə daxili siyasi “kardioqramın” nəzərəçarpacaq dərəcədə dəyişməsi ehtimalı var.

“Bu dəyişikliklər yalnız demokratlar və respublikaçılar müstəvisində deyil, həm də Tramp administrasiyasının daxilində müxtəlif qanadlar arasında baş verə bilər. Yenidən diqqəti son təxminən on gün ərzində vitse-prezident Vensin kölgədə qalmasına yönəltmək istəyirəm.

ABŞ və İsrailin İrana zərbəsi beynəlxalq münasibətlərdə faktiki olaraq bütün “qırmızı xətləri” aradan qaldırır və yalnız nüvə xəttini saxlayır. Nüvə dövlətləri üçün bu, əslində əllərin “operativ-taktiki” baxımdan azad edilməsi deməkdir, iddialı aktorlar, o cümlədən İran üçün isə nüvə ambisiyalarına “arqument” verir.

İranın idarəedici sisteminin daxilində mühafizəkarların mövqelərinin bərpası. Belə görünür ki, mövcud idarəetmə status-kvosu qorunduğu təqdirdə, “islahatçı” qanad uzun müddət İranda ciddi siyasi perspektivə malik olmayacaq”, - deyə erməni politoloq yazıb.

O qeyd edib ki, bu bəndləri təbii olaraq davam etdirmək və müxtəlif altbəndlərlə genişləndirmək olar.

“Çünki biz həqiqətən də fundamental əhəmiyyət daşıyan bir müharibə ilə qarşı-qarşıyayıq. Hətta dörd ildən çox davam edən Ukrayna müharibəsindən də artıq təsirə malik ola bilər. İran ətrafındakı müharibənin nə qədər davam edəcəyini əlbəttə ki, deyə bilmərik, lakin hətta dörd həftə davam edəcəyi halda belə, o, beynəlxalq təsir və dəyişikliklər baxımından Ukrayna müharibəsinin dörd ilindən daha dərin nəticələrə gətirib çıxara bilər”, - deyə Badalyan bildirib.

Alpər Mövludoğlu
Ordu.az