Ordu.az xəbər verir ki, şirkətin paylaşımında KAPLAN MT-nin Türkiyədə layihələndirildiyi və dost, eləcə də müttəfiq ölkələrin ordularının ehtiyaclarını qarşılamaq üçün istehsal edildiyi bildirilib.

Paylaşımda qeyd olunub: “Zirehli birliklər tariximizdə Fransanın FT-17, Rusiyanın T-26, Almaniyanın Panzer III və ABŞ-nin M24 “Chaffee” yüngül və orta tankları Türkiyə ordusunun inventarında yer alıb. Bu gün həmin ehtiyacı qarşılayan tank Türkiyədə hazırlanıb və dost, eləcə də müttəfiq orduların ehtiyacları üçün istehsal olunur. KAPLAN MT 105 və 120 mm çaplı top variantları ilə yüngül və orta sinfinə məxsus tank tələbatını qarşılayan ən müasir sistem kimi xidmətə hazırdır”.

FNSS-nin KAPLAN MT orta çəkili tankı müasir müharibənin dəyişən tələblərinə cavab verən unikal platforma kimi təqdim olunur. Özünəməxsus konstruksiyası sayəsində KAPLAN MT öz sinfində ən alçaq siluetə və ən yüksək güc-çəki nisbətinə malikdir. Optimal çəki və yüksək hərəkət qabiliyyəti üçün hazırlanmış platforma qabaqcıl elektron idarəetmə sistemləri, Yardımçı Güc Qurğusu (APU) və güclü asqı sistemi ilə təchiz olunub.

Bu xüsusiyyətlər tankın gecə və gündüz döyüş əməliyyatlarında, eləcə də kəşfiyyat və manevr tapşırıqları zamanı etibarlı işləməsini və fasiləsiz enerji təminatını mümkün edir. Bundan əlavə, KAPLAN MT-nin yüksək hərəkət qabiliyyəti ekipajın rahatlığını artırır və bütün avadanlıqların istismar müddətinin uzadılmasına töhfə verir.

Platformanın qabaqcıl ballistik və mina mühafizə sistemlərinə malik arxitekturası piyadaların yaxın atəş dəstəyindən iri hədəflərə qarşı zirehdələn sursatların istifadəsinədək geniş atəş gücü imkanları təqdim edir. Dəqiq birbaşa atəş imkanı isə yüksək taktiki və strateji hərəkət qabiliyyəti ilə birlikdə platformaya tələb olunan zərbə gücünü qazandırır.


Sevinc Əliyeva
Ordu.az