Əbu-Dabi görüşü öncəsi ABŞ Dövlət katibi Marko Rubio Vaşinqtonda çıxış edərək Ermənistan və Azərbaycan arasında sülh sazişinin imzalanmasını Prezident Donald Trampın administrasiyasının yaxın 6 ay ərzində mümkün olan əsas diplomatik uğurlarından biri kimi təqdim etmişdi. Dövlət Departamentinin sözçüsü Temi Brüs isə ehtiyatla bildirib: “Dövlət katibi bu barədə səbəbsiz danışmayıb. Əlavə konkret məlumat olduqda, biz onu paylaşacağıq”.

Bununla belə, Birləşmiş Ştatların sülh prosesində hansısa formal və ya rəsmi vasitəçi kimi çıxış etdiyi barədə heç bir təsdiqlənmiş məlumat yoxdur. Əksinə, ötən ilin sonunda Bakı ABŞ Dövlət katibi Antoni Blinkenin təşəbbüsü ilə Vaşinqtonda nəzərdə tutulan Mirzoyan-Bayramov görüşünü ləğv etmiş, danışıqların yalnız ikitərəfli formatda davam etdirilməsinin ən uyğun yol olduğunu bildirmişdi. Elə bu yanaşma Əbu-Dabidə baş tutan görüşdə də öz təsdiqini tapdı.

Əlavə olaraq, Rusiya ilə Azərbaycan arasında son dövrlər müşahidə olunan gərgin fon da bu görüşə xüsusi fon verib. Rusiya Fövqəladə Hallar naziri Aleksandr Kurenkovun Bakıya səfəri, onun Prezident Putinlə yaxınlığı və ehtimal olunan şəxsi məktubla gəlməsi barədə yayılan xəbərlərə baxmayaraq, rəsmi Bakı bu mövzuya dair heç bir açıqlama verməyib. Bu isə göstərir ki, Moskva da bu mərhələdə prosesə açıq və aparıcı şəkildə daxil deyil.

Beləliklə, 10 iyul Əbu-Dabi görüşü bir daha göstərdi ki, Ermənistan və Azərbaycan bu mərhələdə sülh sazişinə doğru irəliləməkdə vasitəçisiz – birbaşa təmaslar və danışıqlar yolu ilə irəliləyirlər. Bu, həm regional balanslara, həm də beynəlxalq aktorların maraq və təsir imkanlarına yeni baxış formalaşdırır.

Aqil Məmmədov
Ordu.az