Ordu.az xəbər verir ki, təxminən 10 aylıq bu müddət ərzində gəmi həm Venesueladakı hərbi reyddə, həm də İran müharibəsində iştirak edib.
ABŞ Dəniz İnstitutunun qeyri-kommersiya təşkilatı tərəfindən idarə olunan “U.S. Naval Institute News”un topladığı məlumatlara görə, gəminin dənizdə keçirdiyi 295-ci gün son 50 ildə aviadaşıyıcı üçün əvvəlki rekordu geridə qoyub. Əvvəlki rekord 2020-ci ildə COVID-19 pandemiyası zamanı 294 gün dənizdə qalan USS “Abraham Lincoln”a məxsus idi.
Bu, uzun müddət evdən uzaqda qalan heyət üzvlərinə təsir, eləcə də gəmi və onun avadanlığına artan yük barədə suallar doğurur. Aviadaşıyıcı artıq bir yanğın keçirmiş və buna görə uzunmüddətli təmirə məruz qalmışdı.
“Ford” xidmətə 2025-ci ilin iyununda başlayaraq doğma limanı olan Virciniya ştatının Norfolk şəhərindən Aralıq dənizinə yola düşmüşdü. Ordu onu oktyabrda Karib dənizinə yönləndirib. Bu, bölgədə nəsillər boyu görünməmiş ən böyük dəniz qüvvələri cəmləşməsi idi.
Aviadaşıyıcı ovaxtkı Venesuela prezidenti Nikolas Maduronun ələ keçirilməsi üzrə hərbi əməliyyatda iştirak edib. Daha sonra İranla gərginliyin artması fonunda Yaxın Şərqə istiqamət alaraq daha çox döyüş görüb.
Gəmi İran müharibəsinin ilk günlərində Aralıq dənizindən iştirak edib, sonra Süveyş kanalından keçərək martın əvvəlində Qırmızı dənizə yollanıb. Lakin camaşırxana bölmələrindən birində baş verən yanğın səbəbindən aviadaşıyıcı geri dönərək təmir üçün Aralıq dənizinə qayıdıb.
Virciniya ştatından senator Tim Keyn bildirib ki, rekord qıran bu xidmət müddəti heyətin psixi sağlamlığına və rifahına “ciddi zərbə vurub”. O qeyd edib ki, yanğın müvəqqəti olaraq 600 dənizçini yatacaq yersiz qoymuşdu.
“Onlar evdə yaxınları ilə olmalı idilər, ABŞ ordusuna şəxsi saray mühafizəsi kimi baxan prezident tərəfindən dünyanı dolaşdırılmamalı idilər”, - deyə demokrat senator bəyanatında bildirib.
Pentaqon rəsmiləri “Ford”un nə qədər müddət daha xidmətdə qalacağını deməyiblər, lakin Hərbi Dəniz Qüvvələrinin ən yüksək rütbəli iki zabiti açıq şəkildə gəminin təxminən 11 ay xidmətdə qalacağını gözlədiklərini bildiriblər. Bu isə gəminin mayın sonlarında evə qayıdacağı anlamına gəlir.
“Hər kəs “Ford”un rekord qıran xidmət müddətini görəcək”, - deyə Dəniz Qüvvələrinin baş zabiti admiral Deril Kaudl martın sonunda Strateji və Beynəlxalq Araşdırmalar Mərkəzində keçirilən müzakirədə bildirib.
Kaudl yanvarda jurnalistlərə bildirib ki, “Ford”un müddətinin uzadılmasına qarşı çıxacaq. O, fevralda “Associated Press”ə deyib ki, komandanlığı daimi olaraq aviadaşıyıcılar istəmək əvəzinə döyüş zonalarında daha kiçik, yeni gəmilərdən istifadə etməyə inandırmaq istəyir.
Hərbi Dəniz Qüvvələri rəsmiləri rəsmi şəkildə “Ford”un rekord qırdığını açıqlamasalar da, “U.S. Naval Institute News”un topladığı məlumatları təkzib etməyiblər.
Digər bir aviadaşıyıcı, USS “George H. W. Bush” Yaxın Şərqə yollanmalıdır və iki həftə əvvəl xidmətə başladıqdan sonra hazırda Afrika sahilləri yaxınlığındakı sulardadır.
“Ford”un 295 günlük xidməti Soyuq müharibə dövrünün rekordundan geri qalır. Bu rekord artıq istismardan çıxarılmış USS “Midway”ə məxsusdur. O, 1972 və 1973-cü illərdə 332 gün xidmətdə olub.
Daha yaxın dövrdə USS “Nimitz” heyəti 2020 və 2021-ci illərdə ümumilikdə 341 gün xidmətdə və evdən uzaqda qalıb. Lakin buna COVID-19-un yayılmasının qarşısını almaq üçün ABŞ-də sahildə tətbiq olunan uzunmüddətli təcrid dövrləri də daxil idi.
Sevinc Əliyeva
Ordu.az
