İlk növbədə, Azərbaycan və BƏƏ-nin xüsusi təyinatlı bölmələrinin əməkdaşlığı təkcə taktiki deyil, siyasi baxımdan da əhəmiyyətlidir. BƏƏ-nin son illər ərzində Yaxın Şərqdə və Şimali Afrikada həyata keçirdiyi hərbi əməliyyatlar göstərir ki, bu ölkənin xüsusi təyinatlı qüvvələri yüksək texnoloji imkanlara, NATO və Qərb standartlarına uyğun hazırlığa malikdir. Azərbaycan üçün bu cür tərəfdaşla birgə təlimlər döyüş metodologiyasının, texniki təchizatın və taktiki planlaşdırmanın yeni səviyyəyə qaldırılması baxımından mühüm təcrübə mənbəyidir. Eyni zamanda, BƏƏ də 44 günlük Vətən müharibəsində əfsanəvi əməliyyatlar həyata keçirən, hibrid müharibə şəraitində sürətli qərarvermə, gizli manevr və unikal döyüş taktikaları ilə fərqlənən Azərbaycan XTQ-dən real döyüş şəraitində qazanılmış təcrübələri öyrənə bilər. Bu, qarşılıqlı bilik mübadiləsini iki istiqamətli və daha strateji xarakterli əməkdaşlığa çevirir.
“Sarsılmaz Tərəfdaşlıq-2025” təliminin konsepsiyası iki ölkənin xüsusi əməliyyat bölmələri arasında koordinasiyanın, birgə əməliyyat planlaşdırmasının və döyüş şəraitində qarşılıqlı fəaliyyətin sınaqdan keçirilməsinə yönəlib. Videogörüntülərdən görünür ki, təlimlərdə dağlıq və şəhər mühitində döyüş, diversiya əməliyyatları, hədəfə yönəlmiş taktiki basqınlar, hava və quru komponentlərinin sinxron fəaliyyəti kimi elementlər əsas yer tutub. Bu, Azərbaycan XTQ-nin son illərdə fokuslandığı sahələrdən biridir: yəni yüksək manevr qabiliyyətinə malik, çevik və texnoloji üstünlüyə əsaslanan müasir döyüş konsepsiyasının tətbiqi.
Təlimin ən diqqətçəkən məqamlarından biri isə Azərbaycan XTQ-nin silahlanmasına ARX-160 avtomatının daxil edilməsi ilə bağlı görüntülərdir. Bu silah İtaliyanın “Beretta” şirkətinin istehsalıdır və NATO standartlarına tam uyğun, modulyar konstruksiyaya malik avtomatdır. ARX-160 həm 5.56x45 mm NATO, həm də 7.62x39 mm kalibrində istifadə edilə bilir, bu isə müxtəlif əməliyyat mühitlərinə uyğunlaşma imkanı yaradır. Silahın əsas üstünlükləri arasında yüngül çəkisi, yüksək etibarlılığı, asan sökülüb-yığılması, sol və ya sağ əl üçün asanlıqla uyğunlaşdırılması və aşağı təmir tələbi göstərilir.
Azərbaycan XTQ-nin bu silahı tətbiq etməsi iki istiqamətdə strateji nəticələr doğura bilər. Birincisi, bu, xüsusi təyinatlı bölmələrin texniki modernizasiyasının davam etdiyini göstərir. ARX-160 kimi silahların istifadəsi Azərbaycan XTQ-ni NATO standartlı qüvvələrə daha da yaxınlaşdırır və beynəlxalq əməliyyatlarda interoperabellik səviyyəsini yüksəldir. İkincisi, İtaliya ilə hərbi-texniki əməkdaşlığın genişlənməsi ehtimalını gücləndirir. Azərbaycan artıq Türkiyə və İsraillə bu sahədə sıx tərəfdaşlığa malikdir, indi İtaliyanın da bu istiqamətə daxil olması Azərbaycanın hərbi diplomatik xəritəsini daha çoxşaxəli edir.
Təlimdə ARX-160-ın tətbiqi eyni zamanda XTQ-nin silahlanma siyasətində keyfiyyət dəyişikliyinə işarə edir. Əvvəllər əsasən ABŞ və Türkiyə istehsalı silahların dominant olduğu xüsusi təyinatlı arsenalda indi Avropa istehsalı müasir sistemlərin də yer alması Azərbaycanın logistika və təchizat infrastrukturunun çoxqütblü xarakter daşımağa başladığını göstərir. Bu həm də siyasi mənada mesajdır: Azərbaycan tək bir hərbi blokun deyil, bir neçə strateji istiqamətin partnyoru olmaq istəyini nümayiş etdirir.
ARX-160-ın seçilməsi texniki baxımdan da rasional qərardır. Silahın istənilən hava şəraitində sabit performans göstərməsi, modulyar sistemi sayəsində gecəgörmə nişangahları, lazer göstəriciləri, səsboğucular və digər aksesuarların quraşdırılması imkanı XTQ kimi yüksək ixtisaslı bölmələr üçün vacib üstünlüklər yaradır. Bu xüsusiyyətlər onu həm şəhər mühitində, həm də dağlıq relyefdə istifadə üçün ideal edir.
“Sarsılmaz Tərəfdaşlıq-2025” təliminin bağlanış mərasimində şəhidlərin xatirəsinin yad edilməsi, dövlət himnlərinin səsləndirilməsi və mükafatlandırma mərasimi bu əməkdaşlığın sırf taktiki deyil, həm də mənəvi-siyasi aspektlərini önə çıxardı. Azərbaycan və BƏƏ-nin bu səviyyədə hərbi əlaqələrinin inkişafı göstərir ki, Bakı artıq Yaxın Şərqdəki güc balansında da özünü etibarlı tərəfdaş kimi təqdim edir.
Nəticə etibarilə, bu təlim Azərbaycanın xüsusi təyinatlı qüvvələrinin beynəlxalq səviyyədə tanınması, texnoloji arsenalının genişlənməsi və strateji tərəfdaşlıq dairəsinin çoxsəviyyələşməsi baxımından mühüm mərhələdir. ARX-160 silahının silahlanmaya daxil edilməsi isə bu prosesin konkret texniki ifadəsidir, Azərbaycan XTQ yalnız regional deyil, beynəlxalq standartlara cavab verən, yüksək mobillik və dəqiqliklə hərəkət edən bir qüvvə formalaşdırır. Bu, həm cəbhə gerisində, həm də diplomatik masada ölkənin mövqelərini gücləndirən bir addımdır.
Ordu.az
