Ordu.az xəbər verir ki, bu barədə o, Ermənistanın aparıcı media qurumlarının baş redaktorları ilə görüşündə danışıb.

Karapetyan qeyd edib ki, etimad amili olmadan hətta rəsmi tanınma belə heç bir müsbət nəticə verməyəcək. O, seçki mərhələsindən sonra ölkənin geosiyasi vəziyyətini təhlil edərkən Moskvanın Ermənistanın Rusiyaya qarşı mübarizədə alət kimi istifadə edilə bilməsinin nə qədər asan olduğunu gördüyünü bildirib.

Partiya liderinin sözlərinə görə, İrəvan nə Rusiyanın, nə ABŞ-nin, nə də Avropa ölkələrinin reaksiyalarını kor-koranə rəhbər tutmamalıdır. O vurğulayıb ki, hər bir böyük güc öz maraqları əsasında hərəkət edir.

“Ermənistanda güclü iqtisadiyyata malik suveren dövlət qurulmayana qədər ölkənin təhlükəsizliyi xarici siyasi qüvvələrin mövqeyindən asılı olaraq həssas qalacaq. Biz başqalarının geosiyasi oyunlarında, Rusiyanın və ABŞ-nin dünyanı bölüşdürmək cəhdlərində iştirak etməməliyik. Lakin Paşinyan yalnız öz hakimiyyətini qorumaq naminə bu yolla gedir və erməni xalqını ciddi təhlükə qarşısında qoyur”, - deyə Karapetyan bildirib.

O, çıxışında hakim “Vətəndaş Müqaviləsi” partiyasının seçki rüşvətində ittiham olunan siyasi qüvvələrin gələcək seçkilərdə iştirakını qadağan etməyi nəzərdə tutan təşəbbüsünə də toxunub.

Karapetyan bildirib ki, müxalifət bu qanun layihəsinin qəbuluna mane olmayacaq və ədalətli siyasi rəqabət ideyasını dəstəkləyir. Bununla belə, o, müxalifət nümayəndələrinə qarşı açılmış cinayət işlərini qondarma adlandırıb.

Onun sözlərinə görə, məhkəmələrdə pul paylanması ilə bağlı sübut olunmuş fakt yoxdur və qonaqlıq vermək seçki rüşvəti hesab edilə bilməz.

“Əgər onların əlində seçki rüşvətinə dair real sübutlar olsaydı, insanları qorxutmaq üçün yalnız yüzlərlə fəalın nümayişkaranə həbsi ilə kifayətlənməzdilər, minlərlə saxlanılan şəxsi bütün dünyaya göstərərdilər”, - deyə o qeyd edib.

Karapetyan əlavə edib ki, Paşinyan komandası seçki kampaniyası boyunca qanunsuz şəkildə geniş inzibati resurslardan istifadə edib.

Onun fikrincə, mövcud hakimiyyət cəmiyyətdə artan narazılığı nəzərə almadan öz mövcudluğunu bir neçə il daha uzatmağa çalışır.

Karapetyan hesab edir ki, onlar üçün ən düzgün addım hakimiyyəti iqtisadi inkişafı təmin edə və dünya gücləri ilə etibarlı, praqmatik münasibətlər qura biləcək qüvvələrə sülh yolu ilə təhvil vermək olardı.

Alpər Mövludoğlu
Ordu.az