Ordu.az xəbər verir ki, bu barədə NATO-nun yaydığı yazılı bəyanatda bildirilib.
Açıqlamada qeyd olunub ki, Kosovoda təhlükəsizlik vəziyyəti son illərdə yaxşılaşmaqda davam edir. Bu çərçivədə iki ildən artıq müddətdə davam edən ehtiyat qüvvələrin rotasiyası 2026-cı ilin yanvar ayında başa çatdırılıb.
NATO hazırkı təhlükəsizlik vəziyyətinin ümumilikdə sabit olaraq qaldığını vurğulayaraq, qarşıdakı bir il ərzində KFOR-un mövcud qüvvə tərkibinin və yerləşdirilməsinin mərhələli şəkildə tənzimlənəcəyini bildirib.
Bəyanatda qeyd edilib ki, KFOR 1999-cu ildən etibarən dəyişən təhlükəsizlik şəraitinə uyğunlaşmaq məqsədilə mütəmadi olaraq yenidən strukturlaşdırılıb.
NATO xatırladıb ki, 2023-cü ildə baş verən gərginliklər və Kosovonun şimalında serblərin çoxluq təşkil etdiyi Zveçan şəhərində KFOR hərbçilərinə qarşı hücumlardan sonra missiya son on ilin ən böyük gücləndirilməsini alıb. Həmin dövrdə bölgəyə təxminən 1000 əlavə hərbçi yerləşdirilmişdi.
Açıqlamada vurğulanıb ki, təhlükəsizlik şəraitinin sabitləşməsi KFOR-a öz vəzifələrini effektiv şəkildə yerinə yetirməyə imkan verir. Missiya BMT Təhlükəsizlik Şurasının 1244 saylı qətnaməsi çərçivəsində bütün icmalar üçün təhlükəsiz mühitin təmin edilməsi və sərbəst hərəkətin qorunması istiqamətində fəaliyyətini davam etdirəcək.
NATO-nun Avropadakı Müttəfiq Qüvvələrinin Ali Baş Komandanı, ABŞ Hərbi Hava Qüvvələrinin generalı Aleksus Q. Qrinkeviç bildirib ki, NATO və KFOR Kosovoda təhlükəsizlik və sabitliyin qorunmasına tam sadiqdir.
Onun sözlərinə görə, bu səylər nəticəsində Kosovonun təhlükəsizlik qurumlarının imkanları genişlənib və sabitlik daha da möhkəmlənib. “Hazırkı şərait KFOR-un say tərkibinin və yerləşdirilməsinin daha da optimallaşdırılması üçün imkan yaradır”, - deyə Qrinkeviç qeyd edib.
O əlavə edib ki, Qərbi Balkanlar NATO üçün strateji əhəmiyyət daşıyan bölgədir və alyans burada hər hansı təhlükəsizlik boşluğunun yaranmasına imkan verməyəcək.
NATO həmçinin bildirib ki, şəxsi heyətin sayının azaldılması iştirakçı ölkələrin planlaşdırılmış rotasiya və geriçəkilmə cədvəllərinə uyğun olaraq qarşıdakı il ərzində mərhələli şəkildə həyata keçiriləcək. Zərurət yaranarsa, proses sahədəki vəziyyətə uyğun olaraq yenidən nəzərdən keçirilə bilər.
Bundan başqa, alyans Avropa İttifaqının vasitəçiliyi ilə aparılan Belqrad-Priştina dialoqunu dəstəkləməyə davam etdiyini vurğulayıb və tərəfləri həll olunmamış məsələlərin aradan qaldırılması üçün konstruktiv danışıqlar aparmağa çağırıb.
Sevinc Əliyeva
Ordu.az
