Ordu.az xəbər verir ki, ölkənin yeni nəsil müdafiə strategiyasında “fiziki süni zəka” (Physical AI) konsepsiyası getdikcə daha mühüm yer tutur.
Bu çərçivədə “Hyundai Rotem” dövlət tərəfindən dəstəklənən iki mühüm layihənin icrasını üzərinə götürərək avtonom hərbi robotlar və insansız döyüş sistemlərinin hazırlanmasında əsas rol oynayacaq.
Layihələrdən birincisi hərbçilərin eyni vaxtda bir neçə insansız robotu təbii dil əmrləri vasitəsilə idarə etməsinə imkan verəcək proqram təminatının hazırlanmasına yönəlib.
Bu sistem sayəsində hər platforma üçün ayrıca idarəetmə qurğusundan istifadə zərurətinin aradan qaldırılması planlaşdırılır. Hazırlanan imkanın “Hyundai Rotem” şirkətinin “HR-Sherpa” insansız quru platforması ilə dördayaqlı robot sistemlərinin koordinasiyalı şəkildə fəaliyyət göstərməsini dəstəkləyəcəyi bildirilir.
Layihənin yekun məqsədi gələcəyin əməliyyat mühitində genişləndirilə bilən robot sürüləri və insanlı-insansız komanda konsepsiyalarının tətbiqinə nail olmaqdır. İkinci layihə isə avtonom sistemlərin real şəraitə çıxarılmasından əvvəl onların virtual mühitdə modelləşdirilməsinə və qiymətləndirilməsinə imkan verəcək rəqəmsal əkiz simulyatorunun hazırlanmasını nəzərdə tutur.
“Hyundai Rotem”in məlumatına görə, bu simulyator müxtəlif döyüş şəraitlərində performans sınaqlarının məkan və zaman məhdudiyyəti olmadan təkrar keçirilməsinə imkan yaradacaq. Proqram çərçivəsində həmçinin dördayaqlı hərəkət imkanına malik, çıxarıla bilən təkərlərlə təchiz olunan və tapşırığa uyğun dəyişdirilə bilən faydalı yüklər daşıyan modul robot platformasının hazırlanması da nəzərdə tutulur.
Mütəxəssislər hesab edirlər ki, “Hyundai Rotem” bu layihələrdə “Hyundai Motor Group”un geniş robot texnologiyaları ekosistemindən mühüm üstünlüklər əldə edəcək. Şirkətin avtonom hərəkət, maşın görməsi və mürəkkəb relyef şəraitində fəaliyyət göstərə bilən qabaqcıl robot sistemləri ilə tanınan “Boston Dynamics” ilə əlaqələri də diqqət çəkir.
Qeyd olunur ki, layihələr Cənubi Koreyanın Ticarət, Sənaye və Enerji Nazirliyi ilə Müdafiə İnkişaf Agentliyinin (ADD) “Hyundai Rotem”i əsas podratçı kimi seçməsindən sonra rəsmiləşdirilib.
Sevinc Əliyeva
Ordu.az
