Ordu.az xəbər verir ki, bu barədə Lukaşenko Astanada jurnalistlərə açıqlamasında danışıb.

BELTA agentliyinin məlumatına görə, o, mayın 24-də Belarus və Fransa prezidentləri arasında baş tutan telefon danışığının təfərrüatlarını açıqlayıb.

Lukaşenkonun sözlərinə görə, Fransa Prezidenti ilə söhbət zamanı Ukrayna mövzusu da müzakirə olunub.

“Biz söhbəti Ukrayna və ruslarla birlikdə yenidən şimaldan Ukraynaya hücum etsək, bunun nəticələri mövzusu ilə yekunlaşdırdıq. O dedi ki, siz başa düşürsünüz ki, biz cavab verməyə məcbur olacağıq. Mən isə dedim: “Siz cavab verməyə deyil, sülhə can atmalısınız”.

O dedi: “Biz sülhə can atırıq”. Mən dedim: “Əgər siz həqiqətən sülhə can atsaydınız, İrəvandakı görüşdə iştirak etdiyiniz kimi... Ola bilsin, Moskva sizin üçün o qədər də münasib deyil, onda Minskə gələrdiniz və mən də, Vladimir Vladimiroviç də sizi Minskdə qarşılayardıq”.

Bunu zarafatla dedim. O isə cavab verdi: “Mən belə görüşü istisna etmirəm”. Mən dedim: “Onda Putinə zəng etmək lazımdır. Gəlmək, oturmaq və kişi kimi danışmaq lazımdır”, - deyə Lukaşenko bildirib.

Belarus Prezidentinin sözlərinə görə, Emmanuel Makron bu təklifə cavab olaraq bildirib ki, əvvəlcə Avropa İttifaqı daxilində məsləhətləşmələr aparmalıdır.

Lukaşenko isə vurğulayıb ki, məhz Fransa Prezidenti bu prosesin əsas hərəkətverici qüvvəsi olmalıdır.

“Mən ona dedim: “Sən artıq ağsaqqalsan, bu qədər ildir hakimiyyətdəsən. Orada başqa kim var? Merts tamamilə gənc siyasətçidir. Starmer də çox gəncdir. Kim danışacaq? Hamısı gəncdir. İtaliyada isə ümumiyyətlə baş nazir qadındır. Bu məsuliyyəti qadının üzərinə qoymaq istəyirsiniz? Sən ağsaqqalsan, hərəkətə keç. Bu gün Avropada əsas fiqurlardan biri və bu prosesin mühərriki sənsən. İrəvana getmisən, indi isə Moskvaya və ya Minskə gəlməlisən. Danışaq və bu məsələni həll edək”, - deyə Lukaşenko qeyd edib.

Sevinc Əliyeva
Ordu.az