Ordu.az xəbər verir ki, “Koluman Otomotiv Endüstri A.Ş.”nin baş direktor müavini Zafer Özcan “Defensehere.com”a şirkətin müdafiə sənayesindəki fəaliyyəti və gələcək hədəfləri ilə bağlı açıqlamalar verib.

Özcan bildirib ki, “Koluman”ın kökləri 1965-ci ilə gedib çıxır və holdinqin istehsal həyata keçirən yeganə müəssisəsi Mersindəki “Koluman Otomotiv” zavodudur.

Özcan sözlərini belə davam etdirib: “Mersin zavodumuzda, müəssisələrimizdə istehsal həyata keçiririk. “Koluman Holding” eyni zamanda “Mercedes Benz Türk”ün səhm ortaqlarından biridir. Buna görə də bizim idarə heyətinin sədri “Mercedes Benz Türk”ün idarə heyətinin üzvüdür. Əlbəttə, bu bölgənin yerli insanları olduqları üçün yalnız satış, marketinq fəaliyyəti və ya dilerlik fəaliyyəti ilə deyil, eyni zamanda istehsal fəaliyyəti ilə də həyatlarını davam etdirmək istəyi daşıyırlar. Bu səbəbdən sənayeyə sərmayə qoyurlar”.

Şirkətin iki Araşdırma və İnkişaf mərkəzinə malik olduğunu qeyd edən Özcan deyib: “Mersindəki Araşdırma və İnkişaf mərkəzimiz həm mülki, həm hərbi layihələr üzərində işləyir, Ankaradakı mərkəzimiz isə tamamilə müdafiə layihələrinə yönəlib”.

HİSAR proqramı ilə başlayan müdafiə istehsalı

“Koluman”ın müdafiə sahəsindəki mühüm addımlarından birinin 2014-cü ildə atıldığını bildirən Özcan deyib ki, şirkət ASELSAN ilə birlikdə Türkiyənin hava hücumundan müdafiə sistemlərindən HİSAR Hava Hücumundan Müdafiə Sistemi proqramında əsas altpodratçılardan biridir.

Özcan bildirib: “Raket buraxılış maşınları, daşıma-yükləmə maşınları və komanda maşınları tərəfində həm ilk prototip istehsallarını və kvalifikasiyalarını həyata keçirdik. Ardınca ikinci və üçüncü dövr olmaqla seriyalı istehsal sifarişlərini yerinə yetiririk”.

Bu prosesdə daha yüksək hərəkət qabiliyyətinə malik maşın platformalarına ehtiyac duyulduğunu gördüklərini bildirən Özcan, yüksək yolsuzluq qabiliyyətinə malik 8×8 və 10×10 maşınlar üzərində işləməyə başladıqlarını və “Derman” markasının bu işlərin nəticəsində ortaya çıxdığını deyib. O qeyd edib ki, layihənin əsası 2017-ci ildə qoyulub və prototip işləri 2019-cu ildə tamamlanıb.

7 min maşın istehsal gücü

“Koluman Otomotiv”in illik istehsal gücünün 7 min maşın olduğunu bildirən Özcan bunun təxminən 1 500 ədədinin müdafiə platformalarına ayrıldığını qeyd edərək bunları söyləyib:

“Bu cür istehsalları həyata keçirə bilmək üçün müəssisəmizdə ilk növbədə hissə istehsalı olmaqla hissə emalı texnologiyalarının yer aldığı müəssisələrimiz, müasir və son texnologiyaya malik səth mühafizəsi və təmizləmə müəssisələrimiz, rəngləmə seximiz mövcuddur. Xüsusilə rəngləmə tərəfini vurğulayaraq demək faydalıdır: Kataforez müəssisəsinə də malikik, bu müəssisə adətən son istifadəçilərin istifadə etdiyi minik maşınlarının istehsalında tətbiq olunan texnologiyadır. Bundan əlavə, əsas qabiliyyətlərimizdən biri qaynaqlı konstruksiyadır və montaj fəaliyyətlərini də bu müəssisə daxilində həyata keçirə bilirik. Robot texnologiyalarına sərmayələrimiz var. Həm rəngləmə texnologiyaları, həm qaynaq texnologiyaları baxımından, qaynaqlı konstruksiyadan sonra rentgen ölçmə texnologiyalarımız və cihazlarımız var və sınaq infrastrukturu və laboratoriyalar baxımından da son dərəcə yaxşı sərmayələr etmiş bir şirkətik”.

Özcan bildirib ki, müdafiə platformaları hərbi standartlara uyğun şəkildə sınaqdan keçirilir, müəssisədə yağışlandırma, 30 faiz və 60 faiz maili səthə dırmanma, həmçinin sudan keçmə kimi sınaq sahələri mövcuddur və maşınların təhvil öncəsi bütün qəbul prosesləri burada həyata keçirilir.

TSQ istinadı ixrac qapısını açır

“Derman” maşınlarının ilk hədəfinin Türkiyə Silahlı Qüvvələrinin inventarına daxil olmaq olduğunu bildirən Özcan deyib ki, 2021-ci ildə imzalanan DROPS maşın müqaviləsindən sonra maşınlar bir il ərzində inventara daxil olub. Daha sonra zirehli akaryanacaq tankeri layihələrinin də işə salındığını bildirib.

Özcan vurğulayıb ki, “Koluman” üçün ən mühüm istinad Türkiyə Silahlı Qüvvələri tərəfindən istifadə olunan sistemlərdir və bu istinad ixrac baxımından kritik rol oynayır:

“Əsas hədəf bazarı NATO-ya üzv ölkələr olan “Koluman Otomotiv” üçün birinci istinad nöqtəsi məhsulların Türkiyə Silahlı Qüvvələri tərəfindən istifadə olunması idi. Xüsusilə Silahlı Qüvvələrimizin istər NATO daxilində güclü mövqeyi, istərsə də təchiz etdiyi avadanlıq, məhsul və platformaları sahədə aktiv istifadə etməsinin yaratdığı üstünlüklər bizim üçün ixrac yolunda atılacaq ən böyük ilk addım idi. Düşünürəm ki, bu addımı uğurla tamamladıq”.

Şirkətin hazırda Körfəz ölkələri başda olmaqla Yaxın Şərq, Avropa və Britaniyada müxtəlif təmaslar apardığını bildirən Özcan yaxın dövrdə ixracla bağlı müsbət inkişaflar gözlədiklərini deyib.

“Kısrak” gəlir

Müdafiə platformalarında yerlilik səviyyəsinin 70-80 faiz olduğunu deyən Özcan şirkətin iki əsas platforma üzərində işlədiyini bildirib.

Bunlardan birinin “Derman” maşını olduğunu xatırladan Özcan sınaq fəaliyyəti başlayan “Kısrak” adlı yeni 4×4 maşın platformasının da yaxın zamanda istifadəçilərin qarşısına çıxacağını açıqlayıb. Özcan bildirib ki, “Kısrak” yüngül və orta səviyyədə zirehlənə bilən, yüksək hərəkət qabiliyyətinə malik, şəxsi heyətin daşınması, təcili yardım maşını və ya akaryanacaq tankeri kimi müxtəlif tapşırıqlarda istifadə oluna biləcək şəkildə layihələndirilib.

“Koluman”ın ticari fəaliyyətinə üstquruluş istehsalı ilə başladığını xatırladan Özcan bildirib ki, şirkət təhlükəli maddələrin daşınması üçün alüminium akaryanacaq tankerləri istehsal edən ilk şirkətlərdən biridir. O, həmçinin HİSAR sistemlərində istifadə olunan elektromexaniki izləmə sistemini Araşdırma və İnkişaf mərkəzində hazırlayan ilk şirkət olduqlarını qeyd edib.

Özcan sözlərini belə tamamlayıb: “Bu qədər fərqli üstquruluşu və platformanı tək bir dam altında layihələndirib istehsal edə və inteqrasiya edə bilən bir quruluşa malikik”.


Sevinc Əliyeva
Ordu.az