Ordu.az xəbər verir ki, “Özen İş Makina” layihələndirmə, istehsal, səth örtükləri, istilik emalı, qaynaq, daşlama, metalizasiya və müştəri tələbinə uyğun olaraq montaj kimi bütün prosesləri əhatə edən xidmətlərlə Türkiyə müdafiə sənayesinə də töhfə verir.

“Özen İş Makina”nın baş direktoru Pınar Okyay həyata keçirdikləri fəaliyyətləri, istehsaldakı bacarıqlarını, fokuslarını və hədəflərini “DefenseHere.com”a danışıb.

Okyay bildirib ki, “Özen İş Makina”nın istehsal yolu 1973-cü ildə Özcan Özozanın iştirakı ilə kiçik bir torna emalatxanasında başlayıb. O, həmin tarixdən etibarən müxtəlif sənaye sahələrinə yönəlik yonma üsulu ilə çoxsaylı hissələr istehsal etdiklərini qeyd edib. Okyay həmçinin bildirib ki, 2006-2007-ci illərdə ikinci nəslin idarəetməyə qoşulması ilə şirkət məhsul çeşidini genişləndirib, fərqli sahələrə yönəlib və ixraca daha çox diqqət ayırıb.

Okyay sözlərini belə davam etdirib: “Hazırda “Özen İş Makina” əlli illik təcrübəsi ilə Türkiyə müdafiə sənayesinə yönəlik çoxsaylı konstruktiv hissələr, alt sistemlər və komponentlər istehsal edir. “Özen İş Makina”nın əsas istehsal sahəsi Mersin Sənaye Zonasında yerləşir. Burada üç, dörd və beş oxlu dəzgahlarımız və qaynaqlı istehsal imkanlarımızla inteqrasiya olunmuş müəssisə kimi fəaliyyət göstəririk. Daha sonra müştərilərimizin tələbi və müdafiə və aviasiya sahəsinə daha çox yönəlmək məqsədilə İç Anadolu bölgəsinə yaxınlığı nəzərə alaraq ikinci müəssisəmizi qurduq. Son on ildir ki, orada da müəssisəmiz fəaliyyət göstərir”.

Okyay istehsal və fəaliyyət sahələri barədə bunları deyib: “Özen İş Makina” yüksək dəqiqlik tələb edən mexaniki və elektromexaniki hissələrin istehsalına yönəlmiş bir şirkətdir. Şirkətimizin əsas gücü texniki çertyoja əsaslanan istehsal, dəqiq emal, keyfiyyətə yönəlmiş proses idarəetməsi və müştəriyə xüsusi istehsal imkanlarının təqdim edilməsidir. Fəaliyyət sahələrimizdə xüsusilə istehsal mühəndisliyi, proseslərin inkişafı, yüksək səviyyəli istehsala uyğunlaşdırma işləri, keyfiyyətin yoxlanılması və seriyalı istehsala hazırlıq ön plana çıxır.

Ənənəvi mənada son istifadəçiyə yönəlmiş şirkət olmaqdan daha çox, müdafiə, aviasiya, enerji, maşınqayırma və digər sənaye sahələri üçün tələb olunan kritik hissələrin və alt sistemlərin istehsal tərəfdaşı kimi özümüzü mövqeləndiririk. Məhsul portfelimiz standart hazır məhsul yanaşmasından çox, müştərilərimizin və əsas podratçılarımızın tələblərinə uyğun formalaşan bu prinsipial istehsal strukturuna əsaslanır. İstehsal sahəsində müxtəlif material növlərində dəqiq emal tələb edən hissələr, montaja hazır alt komponentlər və müəyyən sistemlərin mexaniki ehtiyaclarını qarşılayan xüsusi istehsallar yer alır”.

Okyay bildirib ki, bu çərçivədə quru texnikasının mexaniki və elektron alt sistemləri, hərəkət hissələri komponentləri, ağır silah və minaatan sistemlərinə aid hissələr, eləcə də raket və reaktiv sistemlərdə istifadə olunan kritik komponentlər kimi yüksək dəqiqlik və etibarlılıq tələb edən məhsullar istehsal edirlər. O, həmçinin müştəri spesifikasiyalarına uyğun örtük, emal və qaynaqlı istehsal imkanlarına malik olduqlarını əlavə edib.

“Özen İş Makina”nın yalnız yonma üsulu ilə istehsal edən şirkət olmadığını vurğulayan Okyay deyib: “Biz müştərinin texniki tələbatını istehsala çevirən və bütün aralıq prosesləri həyata keçirən həll tərəfdaşı kimi fəaliyyət göstəririk”.

Şirkətin qarşıdakı dövrdə müdafiə sənayesi layihələrində daha güclü şəkildə iştirak etməyi hədəflədiyini bildirən Okyay, milli layihələrdə istehsal etməyi və ixracyönümlü istehsal sistemini daha da inkişaf etdirməyi planlaşdırdıqlarını qeyd edib. Alt sistemlərin inkişafı və layihələndirməyə yönəlmiş istehsalın şirkətin gələcək hədəfləri arasında olduğunu deyən Okyay, ixracda isə xüsusilə Yaxın Şərq və Şimali Afrika ilə Avropa bazarlarına fokuslandıqlarını bildirib.

“Özen İş Makina”nın uzun illərdir ixrac həyata keçirən şirkət olduğunu xatırladan Okyay hazırda 10-dan çox ölkəyə məhsul ixrac etdiklərini qeyd edib.


Sevinc Əliyeva
Ordu.az