Ordu.az xəbər verir ki, bu barədə bu gün Ermənistanın hakim “Vətəndaş Müqaviləsi” partiyasının ofisi qarşısında jurnalistlərlə söhbətində ölkənin parlamentinin sədri Alen Simonyan ötən gün parlament binasının girişində baş vermiş insidentə münasibət bildirərkən deyib.

“Mən bilirəm ki, bu, haradan yönləndirilib. Yəni gəlib övladını itirmiş, itkin düşənlərin valideynləri və yaxınlarının arasına qarışmaq, siyasi məqsəd güdmək, telefonu açıb canlı yayımda Ermənistan parlamentinin sədrinə cinsi xarakterli təhqirlər səsləndirmək... Bu necə olur, mən vətəndaş deyiləm? Hesab edirəm ki, buna cavab verə biləcək iki və ya üç subyekt var. Birincisi hüquq-mühafizə orqanlarıdır. Əgər onlar mənim hərəkətlərimdə hansısa pozuntu tapsalar, əminəm ki, tədbir görəcəklər. Əgər qarşı tərəfin hərəkətlərində pozuntu tapsalar, ona da reaksiya verəcəklər. İkinci subyekt Ermənistan vətəndaşları, xalqdır. Dünən mənə qarşı bu hücumdan sonra dəstək sözləri yazan hər kəsə təşəkkür etdim. Hesab edirəm ki, hətta ən radikal müxalif saytların şərhlərində belə xalq öz qiymətini verib.

Üçüncü subyekt isə artıq mənim partiyamdır. Əgər partiyam burada pozuntu olduğunu hesab etsə, bunu deyəcək. Hazırda belə müzakirə yoxdur.

Bəsdir bizə qarşı belə yanaşma sərgiləmək ki, siz məmursunuz, parlament sədrisiniz və hesab etmək olar ki, Alenə və başqalarına hər şeyi demək mümkündür. Bu, belə olmayacaq. Demişəm ki, heç kim bizim tərbiyəmizə, qaydalarımıza və qanuna hörmətimizə aldanmasın”, - deyə Simonyan qeyd edib.

O bildirib ki, bu, siyasi qüvvə tərəfindən təşkil olunmuş təxribat idi.

Qeyd edək ki, martın 26-da parlament binası qarşısında Alen Simonyanın iştirakı ilə insident baş verib. Parlament qarşısında aksiya keçirən itkin düşmüş erməni hərbçilərin yaxınlarına yaxınlaşan Simonyanla söhbət mübahisəyə çevrilib. Mübahisə zamanı erməni sakin Simonyanı təhqir edib, o isə cavab olaraq erməni sakini təhqir edib.

Hadisədən sonra Dəmirçyan küçəsindən 2 nəfər polis bölməsinə aparılıb, daha sonra onlar sərbəst buraxılıb.

İnsidentdən dərhal sonra erməni sakinlərdən birinin sualına cavab verən Simonyan deyib: “Əlbəttə, kim məni təhqir edirsə, cavabını verirəm”.

O, itkin düşmüş erməni hərbçilərin yaxınlarına müraciət edərək bildirib: “Biz dəfələrlə görüşmüşük, əgər bu hərəkəti pisləməsəniz, bu insanlara təsir etməsəniz, mən artıq sizinlə nə danışacağam, nə də ünsiyyətdə olacağam. O şəxs özünə mənə qarşı təhqir işlətməyə icazə verdi, bundan sonra sizinlə heç bir əlaqə saxlamayacağam”.

Daha sonra insidentlə bağlı açıqlamasında Simonyan deyib: “Heç bir təhqir olmayıb, “ara” sözündən başqa heç nə deyilməyib. O, təhlükəsizlik əməkdaşlarının tələblərinə tabe olmadı və təxribat törətdi. Sonra isə cinsi xarakterli təhqirlər səsləndirdi, mən də cavab verdim və uzaqlaşmağa çalışdım”.

Alpər Mövludoğlu
Ordu.az