Ordu.az xəbər verir ki, bu barədə Gürcüstan KİV-ləri məlumat yayıb.
İş Xidaşelinin hazırda rəhbərlik etdiyi Civic Idea təşkilatının rəhbəri kimi “TV Pirveli” kanalında verdiyi açıqlamalardan sonra başlanıb. O bildirib ki, Gürcüstanda fəaliyyət göstərən bir qurum əslində “terrorçular məktəbi”dir və həmin qurumun rektoru İranın ali dini lideri Əli Xameneyinin varisi elan olunub.
Bu iddia hakim partiya nümayəndələrinin sərt reaksiyasına səbəb olub. Tbilisi meri Kaxa Kaladze belə iddiaları səsləndirənləri “bu ölkədəki ən böyük terrorçular” adlandırıb. “Xalqın Gücü” partiyasının deputatı Quram Maçaraşvili isə bu cür bəyanatların Gürcüstana qarşı yönəldiyini və məxfi məlumatlara çıxışı olmuş sabiq müdafiə naziri tərəfindən səsləndirilməsinin xüsusilə ciddi məsələ olduğunu bildirib.
Şənbə günü Dövlət Təhlükəsizlik Xidməti bəyan edib ki, son günlər müxtəlif şəxslər Gürcüstanda digər ölkələr tərəfindən həyata keçirilən mümkün cəlbetmə fəaliyyəti barədə ictimai açıqlamalar verib və terrorla bağlı ittihamlar və ya işarələr səsləndiriblər. Qurum bildirib ki, araşdırma başladılıb və bu açıqlamaların müəllifləri bütün istiqamətlər üzrə dindiriləcək, onlara istintaq çərçivəsində konkret faktlar təqdim etmək imkanı veriləcək.
Həmin günün axşamı “Interpressnews” agentliyi Xidaşeli və Sanikidzenin dindirilməyə çağırıldığını bildirib. Hər ikisi suallara cavab verməyə hazır olduqlarını, lakin bunu yalnız hakim qarşısında etmək istədiklərini deyiblər. Xidaşeli növbəti gün təhlükəsizlik xidmətinə gedəcəyini, Sanikidze isə hakimin çağırışını gözlədiyini bildirib.
Dövlət Təhlükəsizlik Xidməti işi son günlər Gürcüstanda İranın təsiri ilə bağlı gedən geniş ictimai müzakirələrlə əlaqələndirib. Qurum açıqlamasında xarici ölkələrin cəlbetmə fəaliyyəti barədə səsləndirilən iddialara da toxunaraq məsələnin bölgədə davam edən hərbi əməliyyatlar fonunda araşdırıldığını qeyd edib.
“Interpressnews” həmçinin “Radio Liberty”nin Hudson İnstitutunun martın 3-də yayımlanan araşdırmasına istinad etdiyini bildirib. Giorgi Kandelaki və Luke Coffey tərəfindən hazırlanan həmin araşdırmada İranın Gürcüstanda təsirini və “təsir infrastrukturu”nu sistemli şəkildə genişləndirdiyi qeyd olunub.
Maçaraşvili eyni zamanda general-mayor Vaxtanq Kapanadzenin açıqlamalarına da istinad edib. Kapanadze İranın Gürcüstan ərazisində, o cümlədən ABŞ səfirliyi və ya Bakı-Tbilisi-Ceyhan neft kəmərinin Gürcüstan hissəsi kimi hədəflərə birbaşa zərbə endirə biləcəyini istisna etmədiyini bildirib.
Sevinc Əliyeva
Ordu.az
