Türkiyə Silahlı Qüvvələrinə məxsus “Korkut” Hava Hücumundan Müdafiə Artilleriya Sistemi “Pençe-Kilit” əməliyyatı bölgəsində terror təşkilatı PKK-ya məxsus kamikadze tipli Pilotsuz Uçuş Aparatını (PUA) zərərsizləşdirib.
Ordu.az xəbər verir ki, PUA-nın məhv edildiyi görüntülər sosial mediada paylaşılıb və böyük marağa səbəb olub.
Son zamanlar İraqın şimalındakı “Pençe-Kilit” əməliyyatı bölgəsində PKK-nın kamikadze PUA-larından istifadəsinin artdığını müşahidə etdikdən sonra “Korkut” Aşağı Hündürlükdə Hava Hücumundan Müdafiə Artilleriya Sisteminin batareyaları bölgəyə yerləşdirilib.
Bölgədə artan PUA hücumlarına qarşı yüksək müvəffəqiyyət nisbəti ilə fəaliyyət göstərən “Korkut” 95%-dən çox effektivliyi ilə seçilir.
Türkiyə Silahlı Qüvvələrinin aşağı hündürlükdə hava hücumundan müdafiə ehtiyaclarını qarşılamaq üçün ASELSAN tərəfindən hazırlanan “Korkut” Sistemi 2016-cı ildə kütləvi istehsala keçib.
Sistem 1 Komanda-İdarəetmə Vasitəsindən və 3 Silah Sistemi Vasitəsindən ibarətdir. O, PUA-lara, helikopterlərə, qanadlı raketlərə və müxtəlif hava təhdidlərinə qarşı effektiv şəkildə tətbiq edilə bilər.
