Ordu.az “Mehrnews”a istinadən xəbər verir ki, Azərbaycan Müdafiə Nazirliyinin Tibb Baş İdarəsinin rəisi, general-mayor Natiq Əliyevin rəhbərlik etdiyi nümayəndə heyəti Baqiyatallah Tibbi Elmlər Universitetinin müxtəlif bölmələrində, Baqiyatallah hospitalında və Cəmaran Ürək Xəstəxanasında olub. Nümayəndə heyəti, buranın tibbi və müalicəvi proseslərini yaxından izləyiblər.

İran Silahlı Qüvvələr İctimai sağlamlıq departamentinin rəhbəri general Həsən Araqizadə azərbaycanlı nümayəndə heyətini qarşılayaraq təhsil, tədqiqat, xəstələrin və ekspertlərin mübadiləsi sahəsində ikitərəfli əməkdaşlığın zərurətindən danışıb.

O, İranın Azərbaycanla tibbi əməkdaşlıq və hərbi tibbin müxtəlif aspektlərində təcrübə mübadiləsi üzrə Anlaşma Mübadiləsi imzalamağa hazır olduğunu elan edib.

Öz növbəsində Natiq Əliyev İranın hərbi tibb sahəsində önəmli nailiyyətlər əldə etdiyini və geridə qalan müharibələrdən ciddi təcrübə qazandığını vurğulayıb. O bildirib ki, hər iki tərəf hərbi tibb sahəsində qarşılıqlı əlaqələr üçün mümkün olan ən yüksək səviyyəli əməkdaşlığı təşviq etmək niyyətindədir.

Ağalar Ağalarlı
Ordu.az