Ordu.az xəbər verir ki, bu barədə ABŞ Prezidenti hərbi əməliyyatların maliyyələşdirilməsinin artırılması ehtimalı ilə bağlı sualı cavablandırarkən danışıb.

CNN müxbirinin ABŞ vətəndaşlarının maliyyə çətinlikləri fonunda “əbədi müharibə” üçün əlavə 80 milyard dollar xərclənməsini dəstəkləyib-dəstəkləmədikləri barədə sualına cavab verən Tramp əvvəlcə telekanalı tənqid edib, daha sonra isə belə siyasətə dəstəyin yüksək olduğunu bildirib.

“Onlar bunu yalnız dəstəkləmirlər, hətta tələb edirlər. Çünki heç kim İranın nüvə silahı əldə etməsinə imkan verməyəcək. Problem görmək istəyirsinizsə, onlara nüvə silahı verin. İranla işlərimiz çox yaxşı gedir. Onlar darmadağın edilmişdilər və biz onlarla razılaşma əldə edirik. Hər şeyin necə inkişaf edəcəyini görəcəyik.

Hazırda, yəqin ki, dünən eşitdiyiniz kimi, Hörmüz boğazından 19 milyon barel neft keçib. Bu, boğaz tarixində ən yüksək göstəricidir. Fond bazarımız rekord səviyyələrdədir, neftin qiyməti isə aşağı düşür. Bu gün qısa müddət ərzində bir barel neftin qiyməti təxminən 70 dollardan da aşağı olub. Ən vacibi isə odur ki, İran nüvə silahı əldə etməyəcək”, - deyə Tramp bildirib.

Sevinc Əliyeva
Ordu.az