Ordu.az xəbər verir ki, bu barədə “NBC News” məlumat yayıb.
Administrasiya təklifi çərşənbə axşamı Federal Reyestrdə dərc edib.
Sənəddə həmçinin rədd edilmiş müraciətlərin yenidən nəzərdən keçirilməsi üçün ödənişlərin 80 faiz artırılması nəzərdə tutulur. Təklif ABŞ-nin 250 illik yubiley tədbirlərinə təxminən iki həftə qalmış təqdim edilib.
Hazırda vətəndaşlığa qəbul prosesinin bir hissəsi olan naturalizasiya müraciətinin dəyəri şəxsən müraciət zamanı 760 dollar, onlayn müraciət zamanı isə 710 dollardır. Administrasiya bu məbləğlərin müvafiq olaraq 1330 dollara və 1280 dollara qaldırılmasını təklif edir.
Bundan əlavə, rədd edilmiş müraciətin yenidən baxılması üçün ödənişin 830 dollardan 1475 dollara yüksəldilməsi planlaşdırılır. Onlayn müraciət zamanı bu xərc 780 dollardan 1475 dollara çatacaq.
Təşəbbüs hüquq müdafiəçilərinin ciddi tənqidinə səbəb olub. Onlar bildirirlər ki, bu addım əvvəlki administrasiyaların vətəndaşlığın daha əlçatan olması istiqamətində gördüyü işlərə zərbə vurur.
Administrasiya isə hesab edir ki, bu xidmətlərdən yararlanan şəxslərin xərcləri özlərinin ödəməsi daha ədalətlidir və bu yük digər yüksək gəlirli vətəndaş qruplarının üzərinə qoyulmamalıdır.
Hazırda gəliri federal yoxsulluq səviyyəsinin 400 faizindən aşağı olan şəxslər 380 dollarlıq güzəştli rüsum ödəyə bilirlər. Yeni təklif həmin imtiyazın ləğvini nəzərdə tutur.
Rüsumların artırılması müraciətçilərin daimi yaşayış statusunu qorumaq üçün “qrin kart”ların yenilənməsi kimi digər xərclərlə yanaşı həyata keçiriləcək.
ABŞ Daxili Təhlükəsizlik Nazirliyi naturalizasiya üçün güzəştli ödənişin saxlanılmasını əsaslandıran səbəbləri kifayət qədər inandırıcı hesab etmədiyini açıqlayıb.
Hüquq müdafiə təşkilatları təşəbbüsü kəskin şəkildə tənqid ediblər. “New York Immigration Coalition” təşkilatının prezidenti və icraçı direktoru Murad Avaudeh bildirib ki, bu artım “Amerika arzusunun son mərhələsinə çatmağa çalışan insanlar üçün növbəti əsassız maneə yaradır”.
“Tennessee Immigrant and Refugee Rights Coalition” təşkilatının hüquq xidmətləri direktoru Allen Şao Kinq isə Konqresin immiqrasiya və sərhəd xidmətlərinə (ICE) bu yaxınlarda ayırdığı 70 milyard dollarlıq vəsaiti nəzərə alaraq təşəbbüsün vaxtını sual altına alıb.
ABŞ Vətəndaşlıq və İmmiqrasiya Xidməti əsasən müxtəlif ödənişlər hesabına maliyyələşdirilir, baxmayaraq ki, Konqres bəzi proqramlar üçün əlavə vəsait də ayırır.
Rüsum artımları əvvəlki administrasiyalar dövründə də baş verib. Bunlardan biri Corc Buşun prezidentliyi dövründə qeydə alınmış və Meksikadan miqrasiyaya nəzərəçarpacaq təsir göstərmişdi.
Təklif üzrə ictimai müzakirələr avqustun 24-dək davam edəcək və iştirak yalnız elektron formada mümkün olacaq.
Sevinc Əliyeva
Ordu.az
