Ordu.az xəbər verir ki, bununla da təxminən 30 il ərzində istehsal olunan SPY-1 radarına malik “Arleigh Burke” variantlarının istehsal prosesi başa çatıb.
“General Dynamics Bath Iron Works” gəmiqayırma zavodu tərəfindən inşa edilən gəmi 2026-cı il mayın 28-də ABŞ Hərbi Dəniz Qüvvələrinə təhvil verilib. DDG-127 ABŞ Hərbi Dəniz Qüvvələrinə təhvil verilən 77-ci “Arleigh Burke” sinfinə məxsus esmines olmaqla yanaşı, AN/SPY-1D radarı və Aegis “Flight IIA” döyüş idarəetmə sistemi ilə təchiz edilən son gəmi kimi tarixə düşüb.
USS “Patrick Gallagher” “Flight I”, “Flight II”, “Flight IIA”, “Flight IIA Restart” və “Flight IIA Technology Insertion” variantlarını əhatə edən təxminən 30 illik inkişaf mərhələsinin son nümayəndəsi hesab olunur.
2017-ci ildə sifariş edilən gəminin tikintisinə 2018-ci ildə başlanılıb. Onun kilinin qoyulması 2022-ci ilin martında həyata keçirilib, 2024-cü ilin iyulunda isə suya buraxılıb. Təxminən doqquz illik prosesdən sonra gəmi ABŞ Hərbi Dəniz Qüvvələrinə təhvil verilib.
Gəminin xidmətə qəbulundan sonra Virciniya ştatındakı “Norfolk” bazasında yerləşdirilməsi planlaşdırılır. Məlumata görə, “Bath Iron Works” və ABŞ Hərbi Dəniz Qüvvələri təhvil qrafikini sürətləndirmək məqsədilə sınaq prosesində yeni üsul tətbiq ediblər.
2026-cı ilin aprelində başlayan dəniz sınaqları zamanı hərəkətverici sistem, elektrik enerjisi istehsalı infrastrukturu, döyüş sistemləri və köməkçi sistemlər eyni vaxtda qiymətləndirilib. Ənənəvi olaraq ayrı-ayrılıqda aparılan bəzi sınaqların birləşdirilməsi nəticəsində təhvil prosesinin 60 gündən çox sürətləndirildiyi bildirilib.
Rəsmilər bunun gəmi heyətinə əməliyyat tapşırıqlarına başlamazdan əvvəl daha çox təlim və sertifikatlaşdırma vaxtı qazandıracağını qeyd ediblər. Təxminən 9200 ton subasımı qabiliyyətinə malik USS “Patrick Gallagher” Aegis döyüş idarəetmə sistemi və AN/SPY-1D radarı ətrafında formalaşdırılmış çoxməqsədli döyüş platformasıdır.
Esminesdə ümumilikdə 96 hüceyrəli Mk 41 Şaquli Buraxılış Sistemi (VLS) yerləşdirilib. Bu sistemdən SM-2 hava hücumundan müdafiə raketləri, SM-3 ballistik raket əleyhinə raketlər, SM-6 uzaqmənzilli hava hücumundan müdafiə raketləri, ESSM hava hücumundan müdafiə raketləri, “Tomahawk” qanadlı raketləri və VL-ASROC sualtı qayıq əleyhinə raketləri buraxıla bilir.
Bu imkanlar sayəsində gəmi hava hücumundan müdafiə, ballistik raketdən müdafiə, sualtı qayıq əleyhinə mübarizə və quru hədəflərinə zərbə vəzifələrini yerinə yetirə bilir. “Flight IIA” variantının əsas üstünlüklərindən biri iki helikopter anqarına malik olmasıdır.
USS “Patrick Gallagher” eyni vaxtda iki MH-60R “Seahawk” dəniz helikopterini daşıya bilir. Bu imkan gəminin sualtı qayıqları aşkar etmə və izləmə radiusunu artırır, həmçinin sualtı qayıq əleyhinə əməliyyatlarda əlavə çeviklik yaradır. Gəmidə Mk 32 torpedo buraxıcıları, 127 mm-lik Mk 45 dəniz topu, “Phalanx” yaxın hava hücumundan müdafiə sistemi və Mk 38 uzaqdan idarə olunan silah sistemləri də mövcuddur.
USS “Patrick Gallagher”ın təhvil verilməsi ilə ABŞ Hərbi Dəniz Qüvvələri artıq tam şəkildə Flight III tipli “Arleigh Burke” esmineslərinin istehsalına yönələcək.
Yeni nəsil “Flight III” gəmiləri AN/SPY-6 Hava və Raketdən Müdafiə Radarı, daha güclü elektrik enerjisi istehsalı və soyutma sistemləri ilə təchiz olunacaq. ABŞ Hərbi Dəniz Qüvvələri indiyədək 23 ədəd Flight III esminesi sifariş edib.
Hazırda “Bath Iron Works” gəmiqayırma zavodunda USS “William Charette” (DDG-130), USS “Quentin Walsh” (DDG-132), USS “John E. Kilmer” (DDG-134) və USS “Richard G. Lugar” (DDG-136) gəmilərinin inşası davam edir.
ABŞ Hərbi Dəniz Qüvvələri SPY-6 radarının təqdim edəcəyi qabaqcıl aşkarlama və izləmə imkanları sayəsində xüsusilə ballistik raketlərə, qanadlı raketlərə və kiçik hava hədəflərinə qarşı hava hücumundan müdafiə qabiliyyətini artırmağı hədəfləyir.
Sevinc Əliyeva
Ordu.az
