Ordu.az xəbər verir ki, bu barədə ABŞ-nin Ermənistandakı səfirliyi məlumat yayıb.

Məlumata görə, ABŞ Dövlət Departamentinin “Kiçik modul tipli reaktor texnologiyasından məsuliyyətli istifadə üçün əsas infrastruktur” proqramı çərçivəsində mayın 19-dan 22-dək “Sargent & Lundy” şirkətinin mütəxəssisləri Ermənistanda səfərdə olublar.

Bildirilib ki, şirkət Ermənistan rəsmiləri ilə əməkdaşlıq çərçivəsində Ermənistan Atom Elektrik Stansiyasının yeni qabaqcıl ABŞ modul tipli reaktor texnologiyaları ilə əvəz olunmasının məqsədəuyğunluğuna dair ilkin texniki-iqtisadi qiymətləndirməni tamamlayıb.

Açıqlamada qeyd olunub ki, Ermənistanda istifadəyə verilməsi üçün ABŞ-nin modul tipli reaktorlarının 4 ən uyğun texnologiyası seçilib.

Bundan əlavə, texniki dəstəyin Atom Enerjisi üzrə Beynəlxalq Agentliyin ən yaxşı təcrübələrinə uyğunlaşdırıldığı, nüvə təhlükəsizliyi, mühafizə və yayılmama sahəsində ən yüksək standartların diqqət mərkəzində saxlanıldığı vurğulanıb.

Həmçinin Ermənistan Atom Elektrik Stansiyasının istismardan çıxarılmasından sonra onu əvəz edəcək potensial imkanların formalaşdırılması variantlarının nəzərdən keçirildiyi bildirilib.

Alpər Mövludoğlu
Ordu.az