Papanın bu qınağı çərşənbə günü Prezident Trampın özünü İsa Məsihlə yanaşı göstərən növbəti viral görüntüsünün yaratdığı qəribə kommunikasiya burulğanı fonunda səslənib. Bu görüntüdən əvvəl Trampı şəfa verən xilaskar kimi göstərən başqa bir vizual da yayılmışdı və indi həmin görüntü memə çevrilir, parodiya edilir, satiraya məruz qalır, indi isə MAGA rəhbəri tərəfindən inkar olunur.
Müxtəlif vaxtlarda Tramp bunu paylaşdığını, paylaşmadığını və əgər paylaşıbsa, sadəcə onu “həkim” kimi göstərmək məqsədi daşıdığını deyib. Bu açıqlama geniş inamsızlıq və istehza seli ilə qarşılanıb. Heç vaxt qeyri-müəyyənliyi boşa verməyən internet isə Prezidenti getdikcə daha səmavi, bəzən də tibbi rollarda göstərən saysız memlərlə cavab verib, İran trolları da bu əyləncəyə qoşulub.
Bu arada Vatikan mem-sənaye kompleksi ilə birbaşa qarşıdurmaya girməkdən imtina edərək ritorikanı daha da sərtləşdirməyi seçib. Papa XIV Leo X platformasında başqa bir paylaşımında açıq şəkildə yazıb: “Sülh hər kəsin məsuliyyətidir və bu, ilk növbədə mülki hakimiyyət orqanlarından başlayır”. O əlavə edib ki, idarəetmək təkcə öz ölkəni deyil, qonşu ölkələri də sevməyi tələb edir. “Biz hamımız eyni evdə yaşayan bir ailəyik”, - deyə Papa bildirib. Bu sözlər Meksika və Kanadadan da uzaqlara əks-səda verib.
Əgər Papa məsəllərlə danışırdısa, MAGA qəzəbli sosial media paylaşımları və zaman-zaman ilahiyyat tənqidləri ilə cavab verib. ABŞ vitse-prezidenti Cey Di Vens, sonradan katolikliyi qəbul etmiş və bunu açıq şəkildə müdafiə edən şəxs kimi, Papanın ilahiyyat sahəsində səlahiyyətlərini açıq şəkildə tənqid etməyi öz üzərinə götürüb.
“Düşünürəm ki, Papa ilahiyyat məsələlərindən danışarkən çox, çox diqqətli olmalıdır”, - deyə o, “Turning Point” konfransında bildirib və əlavə edib ki, bu cür şərhlər “həqiqətə əsaslanmalıdır”.
Əgər tənqidçilərin böyük məmnuniyyətlə diqqət çəkdiyi bir detal olmasaydı, bu açıqlama fərqli qəbul edilə bilərdi: Vensin bu sözləri dediyi vaxt Papa XIV Leo, ilahiyyat və kilsə hüququ üzrə yüksək elmi dərəcələrə malik avqustinçi rahib Əlcəzairin Annaba şəhərində, qədim Hippo şəhərində səfərdə idi. Bura xristianlığın əsas ilahiyyatçılarından biri və hazırda mübahisə mövzusu olan “ədalətli müharibə” doktrinasının müəllifi Müqəddəs Avqustinin vətənidir.
Müxtəlif istiqamətli kilsə liderləri işarə ediblər ki, Trampın hazırkı İran müharibəsi həmin meyarlara uyğun gəlmir və Papa II İohan Pavelin yaddaqalan şəkildə ifadə etdiyi mövqeyi bir daha təkrar ediblər: “Müharibə hər zaman bəşəriyyət üçün məğlubiyyətdir”.
Bütün bunlar MAGA ekosisteminin daha geniş hissəsinin pontifikə hücum etməsinin qarşısını almayıb. Bəzi tərəfdarlar onu “ruhani geyimdə solçu fəal” adlandırıb və Vatikanı administrasiyanın siyasi rəqibləri ilə eyni xəttdə dayanmaqda ittiham ediblər.
İttiham, yəni Papanın kifayət qədər pastoral olmadığı və həddindən artıq siyasi davrandığı iddiası yeni deyil. Tramp özü də bunu səsləndirib.
Vaşinqtonda isə administrasiya geri çəkilmək niyyətində görünmür, halbuki Ağ Ev-Vatikan qarşıdurmasının görüntüsü getdikcə daha bibliya xarakterli hal alır. Süni zəka ilə yaradılmış məsihlər, doktrina mübahisələri və qarşılıqlı mənəvi iddialar fonunda dünya biri dünyəvi, biri ruhani olamqla, planetin ən nüfuzlu iki kürsüsünü izləyir və onların tamamilə fərqli moizələr söylədiyini görür.
Firuz Bağırov
Ordu.az
