“Biz bu gün regional gündəliyin, regional siyasətin bir neçə məsələsini, əlbəttə ki, təhlükəsizliyin təmin olunması və həlli üçün tətbiqi məsələləri müzakirə edəcəyik”, - deyə iclasın əvvəlində Rusiya prezidenti Putin məsələ qoyub.
Diqqətçəkən məqam odur ki, eyni gün Putin Qazaxıstan prezidenti Tokayev və Özbəkistan prezidenti Mirziyoyevlə telefon danışığı aparıb, onlara ABŞ prezidenti Uitkofla danışıqlarının bəzi hissələrini təqdim edib. “Həmsöhbətlər Vladimir Putinə verilən məlumat üçün təşəkkür ediblər”, - deyə “RİA Novosti” xəbər verir.
Rusiya prezidenti regional təhlükəsizlik və regional siyasətin tətbiqi məsələlərinə dair Təhlükəsizlik Şurasının iclasını elə bir şəraitdə çağırıb ki, rusiyalı siyasətçilər, ekspertlər və demək olar bütün KİV-lər Ermənistanın Baş nazirini, müəyyən ehtiyatla isə Azərbaycan Prezidentini Vaşinqtonda görüşməyə və sülh əldə etməyə çalışdıqlarına görə sərt tənqid edirlər.
“Bütün dünya qəhvə fincanına baxaraq Putinin və Trampın görüş mövzularını anlamağa çalışdığı bir vaxtda, Rusiyanın iki sadiq dostu – İlham Əliyev və Nikol Paşinyan – ABŞ prezidentinin nəzarəti altında anlaşma imzalamaq üçün Vaşinqtona tələsiblər”, - deyə Dövlət Dumasının deputatı Konstantin Zatulın bildirib.
Demək olar ki, şübhə doğurmur ki, Təhlükəsizlik Şurasının iclasında Vladimir Putin xüsusi olaraq Vaşinqtondakı Ermənistan-Azərbaycan sammitini və bununla əlaqəli olaraq Rusiya Federasiyasının Cənubi Qafqaza dair gələcək siyasətini müzakirəyə çıxarıb. Təsadüfi deyil ki, əsas məruzəçilərdən biri FTX direktoru Bortnikov olub, çünki postsovet məkanındakı ölkələrlə münasibətlərini Moskva məhz bu xidmətin təqdim etdiyi məlumat və proqnozlar əsasında qurur.
Əlbəttə, Vladimir Putinin Təhlükəsizlik Şurasının iclasındakı müzakirələrə konkret hansı ton verdiyini təxmin etmək çətindir, lakin onun giriş nitqinin alt mətnindən görünür ki, Moskvanın Cənubi Qafqazda mümkün razılaşmalara münasibəti çox yumşaq desək, xoş deyil. Maraqlıdır ki, Konstantin Zatulin açıq şəkildə izah edir ki, Vaşinqtondakı Ermənistan-Azərbaycan sammiti Tramp-Putin ehtimal olunan görüşünün gündəliyinə daxil deyil.
Bundan əlavə, Zatulinin ifadəsindən aydın görünür ki, Ermənistan-Azərbaycan anlaşması Putinin Tramp qarşısındakı mövqelərini zəiflədir. Qazaxıstan və Özbəkistan prezidentləri Putinə hər hansı vəd veriblər, yoxsa Rusiya prezidentinin telefon zəngini “xəbərdarlıq” kimi qəbul ediblər? Bir şey aydındır ki, Moskva ən müxtəlif gərginlikləri alovlandırmağa çalışacaq.
Asif Cəfərov
Ordu.az
