Ordu.az xəbər verir ki, bu barədə Rusiya dövlətinə yaxınlığı ilə tanınan “İzvestiya” qəzeti açıqlanmayan mənbələrə istinadən məlumat yayıb.

Məlumata görə, Çin vətəndaşları beynəlxalq poçt xidmətlərindən istifadə edərək, tez-tez Rusiyadan hərbi texnika və ikili təyinatlı əşyalar keçirməyə cəhd edirlər. Sözügedən hadisələrin ballistik jiletlər, taktiki avadanlıq və digər hərbi geyimlərlə bağlı olduğu, daha sonra xaricə satılmazdan əvvəl daha ucuz materiallardan istifadə edilərək tədqiq edildiyi və təkrarlandığı bildirilib.

Xəbər Çinin Rusiya-Ukrayna müharibəsində getdikcə daha çox iştirak etdiyi bir vaxtda yayılıb. Pekin rəsmi olaraq Moskvaya silah tədarükünü rədd edib, lakin Rusiya 2022-ci ildə Ukraynaya tam miqyaslı müdaxiləyə başladıqdan sonra həm mülki, həm də hərbi məqsədlər üçün istifadə edilə bilən ikili təyinatlı məhsulların əsas təchizatçısına çevrilib.

“The Kyiv Independent” yazır ki, Rusiya hüquq-mühafizə orqanları aprelin ortalarında Moskvada Çin vətəndaşını “Ratnik” taktiki jiletini və modul tipli digər iki taktiki jileti poçtla göndərməkdə ittiham edərək saxlayıb.

“İzvestiya”nın adı açıqlanmayan mənbəyə əsaslanan xəbərinə görə, sözügedən avadanlıq müsadirə edilib və sonrakı araşdırmalar zamanı məlum olub ki, həmin şəxs əvvəllər də oxşar avadanlıqları Çinə göndərib.

Müsadirə edilən əşyalar arasında standart 6B45 ballistik jiletləri, əlavə “Ratnik” sistemləri və taktiki hərbi kürək çantalarının olduğu bildirilir. Sözügedən məhsulların hamısı Rusiya ixrac qanunvericiliyinə əsasən hərbi mallar kimi təsnif edilir. Rusiya hökumətinin 2022-ci il tarixli fərmanı milli təhlükəsizlik baxımından belə məhsulların lisenziyasız ixracını qadağan edir.

Sevinc Əliyeva
Ordu.az