“Lockheed Martin” Ukrayna müharibəsində ən ölümcül silahlardan biri hesab olunan sistem üçün modernləşdirilmiş variant təqdim edib.
ABŞ-nin müdafiə sənayesi nəhəngi yaxın vaxtlarda M142 Yüksək Mobillikli Artilleriya Raket Sistemi (HIMARS) üçün FLEX variantını təqdim edib. Şirkətin bildirdiyinə görə, yeni versiya əsas HIMARS sistemi ilə müqayisədə dəqiqlik, atəş tempi və döyüş meydanına uyğunlaşma qabiliyyəti baxımından ciddi təkmilləşdirmələr təqdim edir.
M142 HIMARS buraxılış qurğusunun texniki xüsusiyyətləri
İstismara qəbul edildiyi il: 2005
İstehsal olunan say: 750-dən çox
Uzunluq: 23 fut (7 metr)
Döyüş vəziyyətində ümumi çəki: 35 800 funt (16 ton)
Asqı sistemi: XM1140 şassisi üzərində parabolik yarpaq yaylı asqı
Mühərrik: “Caterpillar” 3116 ATAAC, 6,6 litrlik, 6 silindrli dizel mühərriki (330 at gücü)
Silahlanma:
- 6 ədəd 227 mm idarə olunan və ya çoxsaylı raket buraxılış sistemi sursatı (G/MLRS)
- və ya 2 ədəd “PrSM” (Precision Strike Missile)
- və ya 1 ədəd MGM-140 ATACMS operativ-taktiki raketi
İstifadə olunan sursat növündən asılı olaraq HIMARS 500 kilometrədək məsafədəki hədəfləri vura və təxminən 1 metr dəqiqliklə zərbə endirə bilir. FLEX versiyası isə iki dəfə daha çox sursat daşıyacaq.
Maksimum sürət: 94 km/saat
Hərəkət məsafəsi: təxminən 480 kilometr
Heyət: 3 nəfər (sürücü, tuşlayıcı, komandir)
“Lockheed Martin”in FLEX sistemi ilə bağlı yeniliklər
M142 HIMARS döyüş meydanında yüksək mobilliyi və uzaq məsafədəki hədəflərə dəqiq zərbə endirmək qabiliyyəti ilə tanınan raket-artilleriya sistemidir. HIMARS-ın FLEX versiyası yeni FLEXFires texnologiya ekosistemi ilə təchiz olunub. Bu sistem yeni sursatlar və avtonom idarəetmə imkanları təqdim edərək daha geniş tapşırıq spektrinin yerinə yetirilməsinə imkan verir.
Yeni variantın ən maraqlı xüsusiyyətlərindən biri PAC-3 kimi hava və raket hücumundan müdafiə sursatlarını da daşıya bilməsidir. PAC-3 raketləri normalda MIM-104 “Patriot” hava hücumundan müdafiə sistemi tərəfindən istifadə olunur. Lakin ən mühüm yenilik əlavə bir buraxılış modulunun quraşdırılmasıdır ki, bu da M142 sisteminin daşıdığı sursat sayını iki dəfə artırır.
“Lockheed Martin Missiles & Fire Control” bölməsinin prezidenti Tim Kahill şirkətin açıqlamasında bildirib: “HIMARS FLEX gələcəyin hücum və müdafiə atəş vasitələrində oyun qaydalarını dəyişdirəcək. FLEXFires texnologiya paketimiz operatorlara sürət və dəqiqlikdən imtina etmədən sursat yükünü artırmağa və avtonom imkanlar əlavə etməyə şərait yaradacaq”.
M142 HIMARS Ukrayna Silahlı Qüvvələrinin istifadəsində böyük populyarlıq qazanıb. ABŞ Ukraynaya onlarla M142 sistemi verib və ukraynalılar onlardan effektiv şəkildə istifadə edərək Rusiya komanda-idarəetmə məntəqələrini, tank cəmləşmələrini, hərbi kazarmaları, sursat anbarlarını və nəqliyyat infrastrukturunu məhv ediblər.
“Lockheed Martin Tactical Missiles” bölməsinin vitse-prezidenti və baş meneceri Qeyliya Kempbell bildirib: “Çeviklik, qarşılıqlı uyğunluq və özünü sübut etmiş performans bu günün ən effektiv çəkindirmə imkanlarını müəyyən edən üç əsas sütundur. HIMARS FLEX müttəfiqlərimizə öz ehtiyaclarına uyğun hücum və müdafiə atəş gücünü formalaşdırmaq imkanı verir və eyni zamanda onları döyüş şəraitində sınaqdan çıxmış ümumi ekosistemə bağlı saxlayır”.
“Lockheed Martin” yeni sistem barədə bildirib: “HIMARS FLEX-in “vur və mövqeyi dəyiş” xüsusiyyəti, artırılmış sursat ehtiyatı, sürətli yenidən doldurma və seçimə bağlı avtonom imkanlarla birlikdə mübahisəli əməliyyat mühitlərində paylanmış və yüksək yaşama qabiliyyətinə malik atəş gücü təmin edir. Bu isə rəqibin hədəfləmə prosesini çətinləşdirir və çəkindirməni gücləndirir”.
HIMARS-ın mobilliyi əsas üstünlüklərdən biridir
Artırılmış mobillik onsuz da yüksək manevr imkanlarına malik raket-artilleriya sisteminin əlavə üstünlüyüdür. Məsələn, M142 HIMARS C-130 “Hercules”, C-5 “Galaxy” və C-17 “Globemaster III” nəqliyyat təyyarələrinə yerləşdirilə bilir.
Onun yüksək mobillik imkanları sistemin qısa müddətdə dünyanın istənilən nöqtəsinə daşınmasına, quru qoşunlarına dəstək verməsinə və cəbhə xəttinin dərinliyində yerləşən düşmən hədəflərinə zərbə endirməsinə şərait yaradır.
Bundan əlavə, raket-artilleriya sisteminin sürəti onu aşağı riskli atəş tapşırıqları üçün ideal silah sisteminə çevirir. HIMARS öz sursatlarını buraxdıqdan sonra hədəfə ilk raketlərin çatmasından əvvəl mövqeyini dəyişə bilir. Bu isə düşmənin əks-artilleriya atəşi ilə sistemi hədəfə almasını demək olar ki, mümkünsüz edir.
Sevinc Əliyeva
Ordu.az
