İllik beynəlxalq təhlükəsizlik konfransında Azərbaycanın güclü komanda ilə təmsil olunacağı şübhəsizdir. Məlumata görə, konfransda Ermənistan da nümayəndəli şəkildə iştirak edəcək. Paşinyan artıq Münhenə gedib, Ermənistan müdafiə naziri Suren Papikyan və XİN rəhbəri Ararat Mirzoyan da nümayəndə heyətinin tərkibindədir.

Hərbi və siyasi platformalarda qələbə qazanmış Azərbaycanın geniş heyətlə iştirakı anlaşılandır. Bəs Ermənistan niyə kifayət qədər geniş təmsil olunur, yoxsa nümayəndələrin iştirakı ən azından Ermənistan və Azərbaycan arasında görüş təşkil etmək cəhdi ilə bağlıdır? Təbii ki, indiyədək heç bir tərəf həmin cəhdlə bağlı açıq açıqlama verməyib və buna görə də belə bir görüşün təşkili cəhdinə görə ictimai məsuliyyəti öz üzərinə götürməyib.

İlham Əliyevlə Paşinyan arasında sonuncu təmas ilin sonunda, MDB liderlərinin Sankt-Peterburqda keçirilən qeyri-rəsmi assambleyası çərçivəsində baş tutub, lakin bunu görüş kimi qəbul etmək mübaliğə olardı, ayaqüstü söhbət baş tutub. Beynəlxalq təhlükəsizlik assambleyası çərçivəsində Münhendə belə bir təmasın olmasını istisna etmək lazım deyil. Görüş halı fərqlidir və burada təşkilatçı və ya vasitəçinin iştirakı qaçılmazdır. Bu isə öz növbəsində o deməkdir ki, görüş hər hansı məsələnin həlli baxımından həmin vasitəçi üçün zəruri olmalıdır. Bu, özlüyündə görüş üçün məsuliyyət deməkdir.

Bəs bu gün elə bir vəziyyət mövcuddur ki, sözügedən görüş hər hansı bir məsələni həll edə bilsin? Görünən mövcud mənzərəyə görə, belə bir vəziyyət yoxdur. Əlbəttə, ola bilər ki, Münhen konfransının rəhbərliyi görüş təşkil etməyə çalışsın, bununla da konfransa əlavə maraq və intriqa təmin etsin.

Yeri gəlmişkən, bu, düz 3 il əvvəl məhz fevralın 16-da İlham Əliyev-Paşinyan debatı baş tutmuşdu. Bundan 8 ay sonra Vətən müharibəsi başladı.

Firuz Bağırov
Ordu.az