Ordu.az xəbər verir ki, bunu Afrika İttifaqı Komissiyasının sədri Mahmud Əli Yusuf Bakıda keçirilən "Afrika Günü 2026: Yüksələn qitə, yeni tərəfdaşlıqlar" mövzusunda tədbirin iştirakçılarına videomüraciətində bəyan edib.
Onun sözlərinə görə, qitənin "G20"də daimi üzvlük əldə etməsi tarixi addım olub.
"Bu, Afrikaya qlobal iqtisadi qərarların qəbulunda tam şəkildə iştirak etmək və sülh, iqlim, ərzaq təhlükəsizliyi, ticarət, səhiyyə və dayanıqlı inkişaf məsələləri üzrə beynəlxalq qərarlara əhəmiyyətli töhfə vermək imkanı yaradıb", - o bəyan edib.
Yusufun sözlərinə görə, Afrika İttifaqı təşkilatın səmərəliliyinin və operativliyinin artırılmasına, həmçinin qitə əhalisinin maraqlarının daha dolğun təmsil olunmasına yönəlmiş institusional islahatları irəli aparmağa davam edir.
O vurğulayıb ki, Afrika İttifaqının cari il üçün gündəliyi 2063-cü il Gündəliyinin hədəflərinin həyata keçirilməsi çərçivəsində dayanıqlı su təchizatının təmin edilməsinə və təhlükəsiz sanitar sistemlərin inkişafına yönəlib.
Yusufun sözlərinə görə, bu, su təhlükəsizliyinin, iqlim dayanıqlılığının və ictimai sağlamlığın Afrikanın gələcəyinin əsası kimi əhəmiyyətli rolunu əks etdirir.
Ordu.az
