Ordu.az xəbər verir ki, sözügedən sifariş ABŞ Hərbi Dəniz Qüvvələrinin avtonom sualtı parkını genişləndirməyə yönəlmiş davam edən proqramının bir hissəsi hesab olunur.
Proqram çərçivəsində insansız sistemlərin müstəqil tapşırıqlarla yanaşı, idarə olunan dəniz platformaları ilə birgə əməliyyatlarda istifadə olunması nəzərdə tutulur.
ABŞ Hərbi Dəniz Qüvvələri bu sistemlərlə əməliyyat mənzilini artırmağı, görünürlüğü azaltmağı və şəxsi heyətin təhlükəsizliyini gücləndirməyi hədəfləyir.
Yeni müqavilə çərçivəsində HII müxtəlif dəstək avadanlıqları da istehsal edəcək. Fəaliyyətlərin Massaçusets və Virciniya ştatlarında həyata keçiriləcəyi açıqlanıb.
Layihənin 2027-ci il mayında tamamlanmasının planlaşdırıldığı bildirilib.
HII yanvar ayında yaydığı açıqlamada “Lionfish” proqramının əsas istehsal mərhələsini tamamladığını və ümumilikdə 42 vasitə gövdəsinin istehsal edildiyini açıqlamışdı.
Bu açıqlama insansız sualtı vasitələrinin ilk təhvilinin 2025-ci ilin aprelində başlamasından təxminən bir il sonra verilib.
Şirkətin 2028-ci ilə qədər proqram çərçivəsində istehsalı davam etdirməsinin gözlənildiyi, ümumilikdə 200 ədədə qədər UUV sifarişinə açıq strukturun mövcud olduğu bildirilir.
“Lionfish”in əsasını REMUS 300 təşkil edir
“Lionfish” sistemi HII tərəfindən hazırlanmış REMUS 300 insansız sualtı platformasını əsas götürür. Platformanın modul strukturu sayəsində gələcək tapşırıq ehtiyaclarına uyğun modernizasiya və yeni sistem inteqrasiyalarının həyata keçirilə biləcəyi qeyd olunur.
ABŞ Hərbi Dəniz Qüvvələri 2022-ci ildə REMUS 300 platformasını mövcud “Swordfish” insansız sualtı platformalarının əvəzinə seçmişdi. “Swordfish” sistemi də daha köhnə REMUS 100 platformasından törədilmişdi və oxşar tapşırıqlarda istifadə olunurdu.
Təxminən 3 metr uzunluğa malik REMUS 300 konfiqurasiyadan asılı olaraq 70 kiloqrama qədər çəkiyə çata bilir. Platformanın enerji doldurma müddətinin də tapşırıq paketindən asılı olaraq 18 saata qədər uzana bildiyi qeyd olunur.
Vasitədə üçqanadlı pər sistemi, akustik və rabitə həlləri, LED və infraqırmızı işıq sistemləri ilə qlobal mövqeləndirmə bloku mövcuddur.
Kəşfiyyat və mina əleyhinə tədbirlərdə istifadə olunacaq
Əməliyyat zamanı REMUS 300-ün maksimal 5 knot (təxminən 9 km/saat) sürətə çata bildiyi, 305 metr dərinliyə qədər tapşırıq yerinə yetirə bildiyi və təxminən 165 kilometr mənzilə malik olduğu bildirilib.
ABŞ Hərbi Dəniz Qüvvələrinin bu tip sistemləri xüsusilə kəşfiyyat-müşahidə, mina əleyhinə tədbirlər, liman təhlükəsizliyi və sualtı qayıqlara qarşı döyüş kimi tapşırıqlarda istifadə etməyi planlaşdırdığı qiymətləndirilir.
Mütəxəssislərin fikrincə, kiçik ölçülü və aşağı radara görünmə qabiliyyətli insansız sualtı platformalar gələcəkdə dəniz müharibələrinin ən kritik elementlərindən birinə çevrilə bilər.
Sevinc Əliyeva
Ordu.az
