Ordu.az xəbər verir ki, şirkət Slovakiya Quru Qoşunları üçün istehsal edilən “Patria” AMV XP 8×8 zirehli təcili tibbi yardım maşınlarının son partiyasını istifadəçiyə təhvil verib.

Proqram çərçivəsində nəzərdə tutulan 10 maşından ibarət son partiya bir neçə gün əvvəl Slovakiyanın Lieskovets şəhərində keçirilən rəsmi mərasimdə aidiyyəti bölməyə təqdim olunub.

Bu təhvil Slovakiya Respublikası, Finlandiya hökuməti və “Patria” arasında 2022-ci ilin avqustunda imzalanmış və ölkənin zirehli maşın tədarük proqramını müəyyənləşdirən genişmiqyaslı hökumətlərarası (G2G) sazişin mühüm mərhələsini təşkil edir.

Müqaviləyə əsasən, zirehli təcili tibbi yardım maşınlarından sonra piyadaların döyüş maşını və komanda-idarəetmə variantlarının da yerli müəssisələrdə istehsal edilərək Slovakiya ordusunun inventarına daxil edilməsi planlaşdırılır.

“Patria”nın Qorunan Mobillik bölməsi üzrə icraçı vitse-prezidenti Yussi Yärvinen təhvil prosesinin tamamlanmasından sonra yerli sənaye əməkdaşlığının əhəmiyyətini vurğulayıb.

“Patria olaraq Slovakiyaya, ölkənin 8×8 zirehli maşın proqramına və yerli tərəfdaşlarla qurduğumuz uğurlu əməkdaşlığa görə minnətdarıq. Bu təcili tibbi yardım maşınlarının təhvilinin tamamlanması əməkdaşlığımızda mühüm dönüş nöqtəsidir.

Proqram müasir mobillik və müdafiə imkanlarının inkişafını dəstəkləməklə yanaşı, Slovakiyaya texnologiya və bilik transferini genişləndirir, yerli sənaye imkanlarını, təchizat təhlükəsizliyini və uzunmüddətli döyüş hazırlığını gücləndirir”, - deyə o bildirib.

Tədarük paketində üç fərqli variant yer alır

Təxminən 447 milyon avro dəyərində olan müqavilə yalnız maşınların tədarükünü deyil, həmçinin logistika dəstəyi, sursat, infrastruktur xidmətləri və geniş texnologiya transferini də əhatə edir.

Slovakiyanın NATO standartlarına uyğunlaşması və mexanikləşdirilmiş bölmələrinin modernləşdirilməsi baxımından mühüm əhəmiyyət daşıyan bu hökumətlərarası saziş ümumilikdə 76 zirehli döyüş maşınının tədarükünü nəzərdə tutur.

Proqram çərçivəsində:

- 60 ədəd zirehli döyüş maşını - EVPÚ istehsalı TURRA-30 uzaqdan idarə olunan döyüş modulu və 30 mm-lik topla təchiz olunacaq,
- 10 ədəd zirehli təcili tibbi yardım maşını - amfibiya imkanlarına malik tibbi təxliyə variantıdır və təhvili artıq başa çatdırılıb,
- 6 ədəd komanda məntəqəsi maşını - taktiki əməliyyatlar üçün optimallaşdırılmış komanda-idarəetmə konfiqurasiyasına malik olacaq.

“Patria”nın fəaliyyət modelinin əsasını təşkil edən texnologiya transferi yanaşması Slovakiya layihəsində də geniş şəkildə tətbiq edilir.

Layihə çərçivəsində KONŠTRUKTA “Defence”, EVPÚ və CSM kimi aparıcı Slovakiya müdafiə şirkətləri ilə strateji tərəfdaşlıqlar qurulub.

Maşınların gövdələrinin istehsalı, döyüş modullarının inteqrasiyası və yekun yığılması mərhələlərində yerli sənayenin fəal iştirakı Slovakiyanın xarici texniki xidmət və təmir zəncirlərindən asılılığını azaldır.

Bu yanaşma platformaların bütün istismar dövrü ərzində logistika dəstəyi və modernləşdirilməsinin ölkə daxilində həyata keçirilməsinə zəmanət verir.

Sevinc Əliyeva
Ordu.az