Ordu.az xəbər verir ki, müqavilə çərçivəsində Kvinslend ştatında 155 mm-lik M795 artilleriya sursatlarının gövdələrinin istehsal ediləcəyi yeni döymə zavodu inşa olunacaq.
Müəssisənin Meribor şəhərində podratçı şirkət tərəfindən idarə ediləcəyi və istehsala 2028-ci ilin sonunadək başlanmasının planlaşdırıldığı bildirilib.
İlkin mərhələdə zavod ildə 15 min ədəd 155 mm-lik M795 sursatı istehsal edəcək. Ehtiyac yaranacağı təqdirdə müəssisənin daha yüksək istehsal həcmlərinə çatmaq imkanına malik olacağı qeyd olunub.
İstehsal ediləcək M795 sursatları Avstraliya Müdafiə Qüvvələrinin (ADF) inventarında olan M777A2 yedəkdə daşınan haubitsalarında və AS9 “Huntsman” özüyeriyən haubitsalarında istifadə olunacaq.
Hökumət bildirib ki, yeni investisiya nəticəsində Avstraliya 2028-ci ilin sonunadək iki ayrı iri çaplı sursat döymə istehsalı qabiliyyətinə malik olacaq. Bununla ölkənin kritik sursat təchizat zəncirində xarici asılılığının azaldılması və ixrac imkanlarının genişləndirilməsi hədəflənir.
Layihənin tikintisi və ilkin istismar mərhələsində təxminən 50 yüksək ixtisaslı iş yerinin yaradılması gözlənilir. Həmçinin Meribor müəssisəsində çalışan mövcud işçi heyətinin peşə bacarıqlarının artırılması planlaşdırılır.
Bu investisiya Avstraliyanın yerli idarəolunan sursat və partlayıcı istehsalı imkanlarını genişləndirməyə yönəlmiş daha geniş müdafiə sənayesi proqramının bir hissəsi hesab olunur.
Kanberra hökuməti həmçinin Viktoriya ştatının Benalla şəhərində yerləşən müəssisədə istehsal olunan 127 mm-lik dəniz topu sursatları xəttinin modernləşdirilməsi üçün “Thales Australia” şirkətinə 9,2 milyon dollar sərmayə ayrıldığını açıqlayıb.
Layihə çərçivəsində istehsal xəttinə yeni avtomatlaşdırma sistemləri və torna dəzgahları əlavə ediləcək. Məqsəd yerli istehsal imkanlarını artırmaq və təchizat zəncirini gücləndirməkdir.
Avstraliyanın Baş nazirinin müavini və müdafiə naziri Riçard Marles bildirib ki, bu investisiyalar ölkənin sursat istehsalı imkanlarını və müdafiə sənayesində özünütəminetmə səviyyəsini artıracaq.
“Rheinmetall NIOA Munitions” ilə əməkdaşlıq çərçivəsində Avstraliyada 155 mm-lik M795 artilleriya sursatlarının istehsalını genişləndirməkdən qürur duyuruq. Bu investisiya suveren müdafiə imkanlarımızı gücləndirəcək, eyni zamanda yüksək maaşlı və ixtisaslı iş yerləri yaradacaq. Bu iki döymə istehsal qabiliyyəti birlikdə Avstraliyanın özünütəminetmə səviyyəsini daha da artıracaq. “Rheinmetall NIOA Munitions” ilə sursat istehsalının gələcəyini formalaşdıracaq bu mühüm addımda əməkdaşlığı səbirsizliklə gözləyirik”, - deyə Marles vurğulayıb.
Sevinc Əliyeva
Ordu.az
