Ordu.az xəbər verir ki, tərəflər gəmilərin mümkün transferi ilə yanaşı, təlim, texniki xidmət, logistika dəstəyi və əməliyyat inteqrasiyasını da əhatə edən geniş proqram üzərində işləməyi planlaşdırırlar.

Yaponiyanın müdafiə naziri Şinciro Koizumi ilə İndoneziyanın müdafiə naziri Sjafrie Sjamsoeddin arasında Tokioda keçirilən görüşdə “Asagiri” sinfinə məxsus esmineslərin transfer imkanlarını araşdıracaq texniki işçi qruplarının yaradılması barədə razılıq əldə olunub.

Danışıqlar çərçivəsində Yaponiyanın xidmətdən çıxarmağa hazırlaşdığı yeddi “Asagiri” sinfinə məxsus esminesin İndoneziyaya verilməsi ehtimalı qiymətləndirilir.

1988-1991-ci illərdə xidmətə qəbul edilən bu sinfə məxsus gəmilər əsasən sualtı qayıqlara qarşı mübarizə tapşırıqları üçün hazırlanıb. Təxminən 4 900 ton tam yüklü subasımı qabiliyyətinə malik olan gəmilər 137 metr uzunluğa malikdir və 30 düyün maksimal sürət yığa bilir.

Gəmilər RGM-84 “Harpoon” gəmi əleyhinə raketləri, RIM-7 “Sea Sparrow” hava hücumundan müdafiə raketləri, ASROC sualtı qayıqlara qarşı müdafiə sistemi, “Mk 46” yüngül torpedaları, OQS-4A sonar sistemi, yedəkdə daşınan sonar kompleksi və SH-60J/K helikopterlərini daşımaq imkanına malikdir.

Mütəxəssislərin fikrincə, “Asagiri” sinfinə məxsus esmineslər İndoneziya Hərbi Dəniz Qüvvələrinin imkanlarını əhəmiyyətli dərəcədə artıracaq. Xüsusilə Malakka boğazı, Natuna dənizi və Sunda boğazı kimi strateji bölgələrdə sualtı qayıqlara qarşı mübarizə və müşayiət əməliyyatlarında mühüm rol oynaya biləcəkləri qeyd olunur.

Bununla yanaşı, gəmilərin yaşı və istismar xərcləri də diqqət çəkir. Təxminən 35-38 illik platformaların genişmiqyaslı texniki xidmət və modernləşdirmədən keçirilməsi tələb olunur.

Hər bir gəmi üçün təxminən 220 nəfərlik heyətə ehtiyac olması İndoneziya üçün əlavə kadr yükü yaradır. Həmçinin qaz-turbinli hərəkət sistemlərinin texniki xidməti mövcud dəniz qüvvələri infrastrukturuna əlavə yük gətirə bilər.

Sevinc Əliyeva
Ordu.az