Ordu.az xəbər verir ki, Türkiyənin və Avropanın ən böyük müdafiə, aviasiya və kosmik sənaye klasteri olan “SAHA İstanbul”un təşkilatçılığı ilə keçirilən SAHA 2026 Beynəlxalq Müdafiə, Aviasiya və Kosmik Sənaye Sərgisi İstanbul Sərgi Mərkəzində davam edir.
İnsansız sistemlər, antidron həlləri və yaxın hava dəstəyi sahələrinə yönəlmiş müdafiə sənayesi məhsulları hazırlayan “HAN Sistem” sərgilədiyi strateji məhsullarla diqqət çəkib.
BARAN, KARAHAN və KANGAL ön plana çıxıb
Sərgidə şirkətin nümayiş etdirdiyi yeni nəsil silah podları, avtonom vasitələr və patentli antidron sistemi BARAN ön plana çıxıb.
Yaxın döyüş antidron sistemi BARAN əməliyyatlar üçün hazırlanmış, 6 lüləli və elektriklə hərəkətə gətirilən sistem olaraq dəqiqədə 1000 atəş imkanına malik silah, radar və süni zəka dəstəkli hədəf aşkarlama sistemi ilə 100-200 metr effektiv mənzil təqdim edir.
“Hava-yer” silah podu sistemi KARAHAN isə yaxın hava dəstəyi əməliyyatları üçün hazırlanıb və pilotlu, eləcə də pilotsuz platformalara uyğunlaşdırıla bilir. CKR-503 “Gatling” tipli silahla inteqrasiya edilmiş sistem 400 ədəd sursat tutumuna malikdir.
Çətin ərazi şərtləri üçün hazırlanmış 4x4 avtonom taktiki quru vasitəsi KANGAL isə insansız hava və quru platformalarının əməliyyatları ilə uyğun şəkildə 500 kilometrlik əməliyyat mənzili və 300 kiloqram faydalı yükdaşıma qabiliyyəti təqdim edir.
BARAN antidron silah sistemi olaraq son həll yoludur
“HAN Sistem” İdarə Heyətinin sədri və baş direktoru Melih Han Bilgin AA müxbirinə açıqlamasında müdafiə sektorunda texnologiya məhsulları hazırlamaq və istehsal etmək məqsədilə fəaliyyət göstərdiklərini bildirib.
Müasir döyüş meydanında pilotsuz uçuş aparatı təhdidlərinin yeni bir konsepsiya ortaya çıxardığını və hədəflərini bu sahəyə yönəltdiklərini vurğulayan Bilgin deyib: “Radara yaxalanmayan, aşağı hündürlükdə hərəkət edən və çoxsaylı əməliyyat həyata keçirə bilən pilotsuz uçuş aparatlarına qarşı çox aşağı hündürlükdə hava hücumundan müdafiə sistemləri, ov patronları və hər birinin daxilində 50 nüvəciyi olan yüksək atəş sürətinə malik fırlanan lüləli silah sistemləri bizim həllimizdir”.
Hazırladıqları sistemlərin beynəlxalq səviyyədə də qeydiyyata alındığını bildirən Bilgin bunları qeyd edib: “Hazırladığımız BARAN silah sistemi ilə dünya patenti almışıq. BARAN xüsusilə antidron silah sistemi olaraq son həll yolunu ortaya qoyacaq kimi görünür. Mexaniki sınaqlarını tamamlamışıq, atış sınaqları mərhələsindəyik. Hələ Silahlı Qüvvələrin inventarına daxil olmayıb, lakin atış sınaqlarını tamamladıqdan sonra çox diqqətçəkən məhsul kimi bazara təqdim edəcəyik. Xarici potensial müştərilərin böyük maraq göstərdiyi bir məhsuldur”.
4 saniyəlik reaksiya müddəti üçün süni zəka dövrədədir
Melih Han Bilgin pilotsuz uçuş aparatlarının havada bir-biri ilə döyüşməsinin müasir döyüş mühitinin reallığı olduğunu bildirərək bu çərçivədə insan gücünə ehtiyac duymayan, tamamilə elektron tətikli sistemlər hazırladıqlarını deyib.
Sistemlərdə süni zəkanın kritik rol oynadığını vurğulayan Bilgin qeyd edib: “Qərarvermə mexanizmlərindən insanı tamamilə çıxarmamışıq, lakin süni zəka daha çox üstünlük təşkil edən qərar mexanizmlərinə doğru yönəlir. Çox aşağı hündürlükdən gələn pilotsuz uçuş aparatlarına qarşı aşkarlama, tanıma və tədbir görmə ilə bağlı ümumi müddətimiz təxminən 4 saniyədir. Bu 4 saniyə ərzində tanımalı, təşhis etməli və tədbir görməlisiniz. 4 saniyədə bunu etməyin yeganə yolu kompüter dəstəkli analizlər hazırlamaqdır”.
Şirkətin AR-GE prosesləri və hədəfləri barədə də məlumat verən Bilgin prioritet diqqətlərinin işin texniki tərəfini sürətlə həll etmək olduğunu vurğulayıb.
Bilgin şirkət olaraq əldə etdikləri nailiyyətlərin böyük potensial göstərdiyini bildirib: “Dünyada xüsusilə aşağı hündürlüklü antidron sistemləri sahəsində texnologiya və həll mərkəzi olmaq konkret hədəfimizdir. Pilotsuz uçuş aparatı müharibələrinin olduğu hər yer bizim məhsullarımızın bazarıdır”.
Sevinc Əliyeva
Ordu.az
