Ordu.az xəbər verir ki, BAYKAR-ın baş direktoru Haluk Bayraktar KIZILELMA-nın 2026-cı il ərzində ilk seriyalı təhvillərinin həyata keçirilməsinin hədəfləndiyini, eyni zamanda “Baykar”ın kosmos, mühərrik və yüksək sayda sursat istehsalı infrastrukturlarına yönəlmiş investisiyalarını fasiləsiz davam etdirdiyini bildirib.
KIZILELMA-da seriyalı təhvil hədəfi 2026-cı ilin ikinci yarısıdır
Haluk Bayraktar “Baykar”ın tamamilə öz resursları ilə hazırladığı “Bayraktar” KIZILELMA-nın şirkətin 25 illik pilotsuz uçuş aparatı təcrübəsinin çatdığı ən qabaqcıl nöqtə olduğunu bildirib.
Bayraktar deyib: “KIZILELMA bizim üçün döyüşən pilotsuz döyüş təyyarəsi konsepsiyasının konkret qarşılığıdır”.
2022-ci il dekabrın 14-də ilk uçuşunu həyata keçirən platformanın həmin tarixdən etibarən intensiv uçuş sınaqlarından keçdiyini bildirən Bayraktar sistemin seriyalı istehsal mərhələsinə keçirildiyini və ilk təhvillərin 2026-cı il ərzində həyata keçirilməsinin hədəfləndiyini ifadə edib.
Mühərrikdən başqa bütün kritik sistemlər yerlidir
Bayraktar mövcud konfiqurasiyada KIZILELMA-dakı yeganə xarici tədarük komponentinin mühərrik olduğunu, bundan başqa bütün əsas sistemlərin Türkiyədə hazırlandığını bildirib.
Platformanın
Avionik sistemlər,
Uçuş idarəetmə infrastrukturu,
Yanacaq sistemləri,
Eniş dəstləri,
Struktur komponentləri,
Yerüstü dəstək sistemləri,
Rabitə həlləri başda olmaqla yüzlərlə alt sisteminin yerli sənaye tərəfindən istehsal edildiyini qeyd edib.
Dünyada bir ilk: Pilotsuz döyüş təyyarəsindən “hava-hava” nişanalması
Haluk Bayraktar KIZILELMA-nın sınaq prosesində mühüm mərhələyə də imza atdığını açıqlayıb.
ASELSAN tərəfindən hazırlanan AESA radar və TÜBİTAK SAGE tərəfindən hazırlanan “hava-hava” raketlərinin inteqrasiyası sayəsində KIZILELMA-nın uçuş sınaqlarında “hava-hava” hədəfini uğurla vurduğunu bildirən Bayraktar bunun pilotsuz döyüş təyyarəsi konsepsiyasında dünyada bir ilk olduğunu ifadə edib.
“Bu uğuru həyata keçirən ilk sistem KIZILELMA oldu”, - deyə Bayraktar qeyd edib.
2027-ci ildə istehsal gücünün ikiqat artırılması planlaşdırılır
Bayraktar KIZILELMA təhvillərinin başlamasından sonra istehsal gücünün sürətlə artırılacağını bildirib.
Planlamaya əsasən, 2027-ci ildə KIZILELMA istehsal gücünün ən azı ikiqat artırılması hədəflənir.
“Baykar”ın investisiya gündəliyi: Kosmos, mühərrik və sursat
Haluk Bayraktar şirkətin investisiya proqramının yalnız pilotsuz uçuş platformaları ilə məhdudlaşmadığını vurğulayıb.
Bu çərçivədə
“Fergani” kosmos təşəbbüsü,
Porşenli mühərrik hazırlama fəaliyyətləri,
Turbofan mühərrik işləri,
“Gəzən sursat” istehsalı infrastrukturları eyni vaxtda həyata keçirilir.
Bayraktar “Bayraktar TB2” və müxtəlif “gəzən sursat”larda istifadə olunan porşenli mühərriklərin yerli olaraq hazırlandığını, turbofan mühərrik işlərinin isə intensiv şəkildə davam etdiyini bildirib.
“Gəzən sursat”larda avtomobil tipli istehsal modeli
“Gəzən sursat”ların klassik pilotsuz uçuş aparatı platformalarından fərqli istehsal məntiqi tələb etdiyini bildirən Bayraktar bu sistemlərin sərf edilə bilən quruluşları səbəbindən çox yüksək sayda və aşağı xərclə istehsal edilməsinin vacib olduğunu deyib.
Bayraktar illik istehsal hədəflərinin “on minlərlə” səviyyəsində olduğunu ifadə edərək bu səbəbdən istehsal infrastrukturunda avtomobil sektoruna bənzər robotik və standartlaşdırılmış istehsal xətlərinə keçid edildiyini qeyd edib.
SAHA 2026 çərçivəsində italiyalı bir şirkətlə robotik istehsal xətti müqaviləsi imzaladıqlarını açıqlayan Bayraktar yüksək sayda istehsal üçün güclü və fasiləsiz tədarük zəncirinin də kritik əhəmiyyət daşıdığını vurğulayıb.
“Gəzən sursat” mühərrikləri də “Baykar” tərəfindən hazırlanır
Bayraktar “gəzən sursat”ların yüksək sayda istehsal tələbləri səbəbindən mühərriklərin də şirkət daxilində hazırlandığını bildirib.
Mühərriklərin sınaqlarının tamamlandığını və seriyalı istehsal xətlərinin yaradıldığını bildirən Bayraktar bu yanaşmanın xarici asılılığı azaldarkən istehsal davamlılığını təmin etdiyini ifadə edib.
81 vilayətdə pilotsuz uçuş aparatı təlim və istehsal mərkəzləri qurulacaq
Haluk Bayraktar “SAHA İstanbul” tərəfindən əldə edilən sərgi gəlirlərinin Türkiyə üzrə pilotsuz uçuş aparatı təlim infrastrukturlarına çevrilməsinin planlaşdırıldığını açıqlayıb.
Bayraktarın verdiyi məlumata görə, 81 vilayətdə və Şimali Kipr Türk Respublikasında pilotsuz uçuş aparatı təlimi, sınaq və istehsal mərkəzlərinin qurulması hədəflənir.
Layihə çərçivəsində
Pilotsuz uçuş aparatı dəstlərinin tədarükü,
Təlim portallarının yaradılması,
Mövcud Milli Texnologiya Emalatxanaları ilə inteqrasiya,
Gənclərin pilotsuz uçuş aparatı istehsalı və sınaq proseslərinə cəlb edilməsi məqsəd qoyulur.
İstanbulda açıq istifadəyə malik “Drone Park” qurulacaq
“Baykar” həmçinin İstanbulda hər kəsin istifadəsinə açıq genişmiqyaslı “Drone Park” qurmağı planlaşdırır.
Layihədə
Pilotsuz uçuş aparatı istehsal emalatxanaları,
Təlim sahələri,
Sınaq meydançaları,
Yarış sahələri yer alacaq.
Bayraktar sözügedən layihənin “Baykar”ın sosial məsuliyyət vizyonunun bir hissəsi olduğunu və gənclərin erkən yaşda texnologiya hazırlama proseslərinə cəlb edilməsinin məqsəd qoyulduğunu bildirib.
Sevinc Əliyeva
Ordu.az
