Ordu.az xəbər verir ki, Rusiyanın dövlət şirkəti “Rostec” yayımladığı yeni mətbuat bülletenində Rusiya Müdafiə Nazirliyinə yeni döyüş təyyarələri partiyası təhvil verdiyini bildirib.
Bu çərçivədə şirkət “Su-35S” seriyalı təyyarələrdən ibarət partiyanı təhvil verib. Şirkətin açıqlamasında deyilir:
“Rostec” Rusiya Hava və Kosmik Qüvvələrinə yeni partiya “Su-35S” çoxməqsədli döyüş təyyarələri təhvil verdi. 4++ nəsil təyyarələr tam zavod sınaq dövrünü başa vurdu, Rusiya Müdafiə Nazirliyinin pilotları tərəfindən müxtəlif iş rejimlərində sınaqdan keçirildi və öz əsas bazalarına uçuşlarını həyata keçirdi”.
“Su-35S” döyüş təyyarələrinin hava üstünlüyü yaratmaq və dərinlikdə yerləşən quru infrastruktur hədəflərini vurmaq məqsədilə hazırlandığını vurğulayan “Rostec”in birinci baş direktor müavini Vladimir Artyakov platformanın döyüş göstəricilərinə diqqət çəkib. Artyakov “Su-35S”in müasir dövrün ən effektiv döyüş təyyarələrindən biri olduğunu və məhv edilən düşmən hərbi təyyarələrinin sayı baxımından rekord sahibi olduğunu iddia edib.
Rusiya Hava və Kosmik Qüvvələrinin bir pilotunun sözlərinə görə, heyət bu təyyarədən uzaq məsafədəki hava hədəflərinin qarşısını almaq, zərbə qruplarını və yer obyektlərini qorumaq, pilotsuz uçuş aparatlarını məhv etmək, dəqiq silahlarla quru və suüstü hədəflərə nöqtə zərbələri endirmək kimi çoxsaylı əməliyyat tapşırıqlarını yerinə yetirmək üçün istifadə edir. Bu çoxşaxəli əməliyyat imkanlarına əlavə olaraq pilotlar təmas xəttinin xeyli dərinliyinə sızaraq kəşfiyyat fəaliyyəti apardıqlarını və düşmən mövqelərini müəyyən etmə tapşırıqlarını da uğurla yerinə yetirdiklərini vurğulayırlar.
Bundan əlavə, Artyakov bildirib ki, təyyarələr xidmət zamanı özlərini sübut etmiş vəziyyətdədir. Rusiyanın dövlət xəbər agentliyi TASS-ın məlumatına görə, “Rostec”in törəmə şirkəti olan UAC-nin baş direktoru Vadim Badexa isə belə qiymətləndirmə verib:
“Dövlət müdafiə tədarük sifarişlərinin qeyd-şərtsiz yerinə yetirilməsi ən böyük prioritetimizdir. Bu, ilk növbədə operativ-taktiki təyyarələri əhatə edir. İstehsal proseslərinin fasiləsiz şəkildə təkmilləşdirilməsi və optimallaşdırılması lazımi istehsal tempini təmin edərək Rusiya Hava və Kosmik Qüvvələrinin ən son texnologiyalı təyyarə sistemlərinə olan tələbatını qarşılayır”.
Sevinc Əliyeva
Ordu.az
