Ordu.az xəbər verir ki, NIOA idarə olunan silah komponentlərinin Avstraliyada istehsalını genişləndirmək məqsədilə “L3Harris Technologies” ilə strateji razılaşmasını yeniləyib.
Sözügedən razılaşma müasir raket sistemlərində kritik əhəmiyyətə malik bərk yanacaqlı raket mühərrikləri və döyüş başlıqlarının yerli istehsalını hədəfləyən 2023-cü il tarixli tərəfdaşlığın davamıdır.
Rəsmilər yenilənmiş razılaşmanın Avstraliyanın 2030-cu ilə qədər yerli istehsal potensialı yaratmağı hədəfləyən İdarə Olunan Silahlar və Partlayıcı Sursat (GWEO) planı çərçivəsində müdafiə sənayesi infrastrukturunu gücləndirmə məqsədi ilə uyğun olduğunu bildiriblər.
İstehsal planları qanadlı raketlər və hava hücumundan müdafiə önləyiciləri kimi sistemlərdə istifadə olunan kritik hərəkətverici və döyüş başlığı komponentlərinə yönəlib. “L3Harris” hazırda ABŞ və müttəfiq ölkələrə aid bir çox proqram üçün, o cümlədən Avstraliyanın son dövrlərdəki Xarici Hərbi Satış (FMS) proqramları ilə əlaqəli layihələr daxil olmaqla, hərəkətverici sistemlər təmin edir.
NIOA Qrupunun baş icraçı direktoru Rob Nioa bildirib: “Yaxın Şərq və Avropanın bəzi bölgələrində baş verən müasir münaqişələr idarə olunan silahlar və önləyici raketlərin nə qədər yüksək istehlak səviyyəsinə çatdığını açıq şəkildə göstərdi”.
Müdafiə istehsalında potensial artımı
Avstraliya son illərdə böyük müdafiə şirkətləri ilə qurduğu tərəfdaşlıqlar vasitəsilə yerli silah istehsalına yatırımlarını sabit şəkildə artırıb və bir çox layihə planlaşdırma mərhələsindən icra mərhələsinə keçib.
2025-ci ilin dekabrında “Lockheed Martin Australia” Cənubi Avstraliyada İdarə Olunan Raket Sistemi (GMLRS) sursatlarının istehsalını dəstəkləmək məqsədilə yeni bir müəssisədə fəaliyyətə başlayıb.
Bu müəssisə həmin sistemlərin ABŞ-dən kənarda ilk dəfə yığıldığı yer kimi qeydə alınıb və zamanla yerli istehsal potensialının daha da genişləndirilməsi planlaşdırılır.
Layihə Avstraliyanın yerli raket sənayesini qurmaq və təchizat zəncirlərini gücləndirmək məqsədilə 21 milyard Avstraliya dollarına (təxminən 15 milyard dollar) qədər dövlət maliyyəsi ilə dəstəklənən GWEO təşəbbüsünün bir hissəsidir.
“Lockheed Martin” ilə yanaşı “Raytheon” və “Kongsberg” kimi digər böyük müdafiə şirkətləri də Avstraliyanın istehsal təşəbbüsünə inteqrasiya olunub. Bu tərəfdaşlıqlar raket komponentlərinin yerli istehsalının artırılmasına və müttəfiq sistemlərlə əlaqəli uzunmüddətli istismar qabiliyyətlərinin inkişafına yönəlib.
Sevinc Əliyeva
Ordu.az
