Ordu.az xəbər verir ki, ölkənin 7 ton sinfinə məxsus ilk pilotsuz yük platforması “Changying-8” (CY-8) Henan əyalətinə bağlı Çjençjou Şanqjie Hava Limanında ilk uçuşunu uğurla həyata keçirib.

“Beijing Beifang Changying UAV Technology” tərəfindən hazırlanmış platforma sınaq uçuşu çərçivəsində təxminən 280 metrlik uçuş zolağından istifadə edərək havaya qalxıb və ilk uçuşunda 30 dəqiqə havada qalıb.

Uçuş zamanı uçuş idarəetmə sistemi, aviyonik infrastruktur, yanacaq sistemi və elektromexaniki komponentlər ətraflı şəkildə sınaqdan keçirilib, platforma planlaşdırıldığı kimi təhlükəsiz eniş edərək sınaq prosesini uğurla tamamlayıb.

“Changying-8” xüsusiyyətləri

“Changying-8” texniki imkanları ilə klassik yük pilotsuz uçuş aparatlarından fərqlənir. Platforma 7 ton maksimum qalxma çəkisi və 3,5 ton faydalı yük tutumu ilə diqqət çəkir, 18 kubmetrlik geniş yük həcmi sayəsində müxtəlif yük növlərinin daşınmasına uyğun şəkildə hazırlanıb. 3000 kilometrdən artıq mənzili və 8000 metr xidmət tavanı ilə uzun məsafəli logistika əməliyyatlarında effektiv istifadə nəzərdə tutulur.

İki turboprop mühərriklə təchiz olunan sistem təxminən 200-280 metr kimi çox qısa zolaqlardan qalxma və enmə həyata keçirə bilir. Bu qabiliyyət onu xüsusilə infrastruktur imkanları məhdud olan bölgələrdə, dağlıq ərazilərdə və ön bazalarda istifadə üçün əlverişli edir.

Çoxşaxəli istifadə ssenariləri

“Changying-8” yalnız klassik yük daşımaları ilə məhdudlaşmır. Platformanın soyuq zəncir logistikasından fövqəladə yardım daşımalarına, sərhəd bölgələrinə təminat missiyalarından çətin ərazi şəraitində əməliyyatlara qədər geniş istifadə sahəsi nəzərdə tutulur.

Bundan əlavə, platformanın meşə yanğınları ilə mübarizə və fövqəladə hallarda logistika dəstəyi kimi kritik vəzifələrdə də istifadə olunması planlaşdırılır. Təxminən 15 dəqiqə kimi qısa müddətdə yükləmə və boşaltma imkanı böhran vəziyyətlərində sürətli reaksiya qabiliyyətini əhəmiyyətli dərəcədə artırır.

Sevinc Əliyeva
Ordu.az