Ordu.az xəbər verir ki, Müdafiə Satınalma Proqramı Administrasiyası (DAPA) aprelin 23-də verdiyi açıqlamada danışıqların aprelin 19-22-də Bağdadda keçirilən IQDEX 2025 müdafiə sərgisi çərçivəsində baş tutduğunu bildirib.
DAPA-nın məlumatına görə, helikopter proqramı bölməsinin rəhbəri Ko Hyunq-seok İraq Müdafiə Nazirliyinin yüksək rütbəli rəsmiləri ilə daha geniş hərbi əməkdaşlığı müzakirə etmək üçün görüşüb.
Müzakirə olunan mövzular arasında Cənubi Koreyanın “KUH-1 Surion” ümumi məqsədli helikopterinin, yerli istehsal olan döyüş təyyarələrinin və mobil HHM platformalarının potensial satışı olub.
Agentliyin qeyd etdiyi kimi, bu danışıqlar İraq və Koreya Aerokosmik Sənayesi (KAI) arasında 2024-cü ilin dekabrında iki “Surion” helikopterinin və müvafiq əməliyyat texniki xidmət obyektlərinin çatdırılması üçün imzalanmış müqaviləyə əsaslanır.
Müqavilə 135,8 milyard von və ya təxminən 101 milyon dollar dəyərində qiymətləndirilib. Lakin DAPA rəsmisi qeyd edib ki, İraqın maraq dairəsi bu ilkin razılaşmadan kənara çıxır.
Qeyd edək ki, Bağdadda keçirilən və IQDEX kimi tanınan Beynəlxalq Müdafiə Sərgisi hökumətdə təmsil olunan müdafiə rəsmilərini və qlobal müdafiə şirkətlərini bir araya gətirən Yaxın Şərqdə ən mühüm tədbirlərdən biridir.
Builki tədbirdə KAI, “LIG Nex1” və “Hyundai Rotem” də daxil olmaqla, Cənubi Koreyanın əsas müdafiə istehsalçıları iştirak edib. DAPA bu firmaların Cənubi Koreyanın hərbi texnologiyasını və etibarlılığını potensial Yaxın Şərq alıcılarına nümayiş etdirdiyini bildirib.
Sevinc Əliyeva
Ordu.az
