Xəbər lentində hələ də bu barədə çox az məlumat verilir, lakin müzakirələrin əsasını İsrail-Fələstin probleminin təşkil etdiyi özlüyündə aydındır. Həmin gün çoxları üçün gözlənilmədən “ürək tutması keçirdiyi və evdə qaldığı” bildirilən İsrailin Baş naziri Netanyahu Yerusəlimdə yəhudi icmasının nümayəndələri ilə açıq görüş keçirib və Ramazan bayramı münasibətilə müsəlmanlar üçün Əl-Əqsa məscidinə maneəsiz yol açmağa çağırıb.
İƏT-ə üzv ölkələrin xarici işlər nazirlərinin konfransında Azərbaycanın xarici işlər naziri Ceyhun Bayramov da iştirak edib. İlham Əliyev ilin əvvəlində islamofobiya ilə mübarizənin ön cərgəsində durmağa hazır olduğunu bəyan edib. Səudiyyə Ərəbistanında İran və Azərbaycanın xarici işlər nazirləri arasında təkbətək görüş keçirilib və bu görüşdə Ceyhun Bayramov mövcud regional vəziyyət, eləcə də Azərbaycan və Ermənistan arasında sülh prosesinin cari vəziyyəti və perspektivləri barədə qarşı tərəfə məlumat verib.
Ermənistanın sülh və sabitliyə xidmət etməyən üçüncü tərəfləri bölgəyə cəlb etməsi, Ermənistanın bəzi dövlətlər tərəfindən silahlandırılması səylərinin sülh prosesinə təhdid olduğu görüş zamanı vurğulanıb. Nazirlər, həmçinin Azərbaycanın səfirliyinə terror hücumunu törədən şəxsə qarşı məhkəmə hökmündən sonra, səfirliyimizin işinin bərpası istiqamətində addımlar barədə fikir mübadiləsi aparıblar.
Ötən il İranda Azərbaycanın diplomatik nümayəndəliyinə qarşı terror aktı törədən şəxs barəsində ölüm hökmü çıxarılıb. Məlumata görə, Azərbaycan diplomatları tezliklə Tehrana gedəcəklər. Mümkündür ki, səfirliyin fəaliyyəti dərhal və tam həcmdə bərpa olunmasın. Təbii ki, bu, təhlükəsizlik tədbirlərinin tam başa çatdırılmasından sonra həyata keçiriləcək.
Ceyhun Bayramovun Ermənistanın sülh və sabitliyə xidmət etməyən üçüncü tərəfləri bölgəyə cəlb etməsi müşahidəsinə əsasən, Azərbaycan Tehranın bu məsələdə daha aydın və sərt mövqe nümayiş etdirməsini istəyir. Bəs, hətta diplomatik çıxış olsa belə, Aİ-nin Ermənistandakı müşahidə missiyasının əleyhinə danışmaq İranın maraqlarından irəli gəlmirmi? Əgər həqiqətən də İranın Yaxın Şərqdə müstəqil Fələstin dövlətinin yaradılmasından başqa böyük vəzifəsi yoxdursa, bunu gözləməyə dəyməz.
Belə bir təəssürat yaranır ki, İran Fələstin məsələsində kəskin mövqeyini ortaya qoyarkən, Qərbə qarşı birmənalı bəyanatlar səsləndirərkən, Ermənistanda yerləşdirilən Aİ müşahidəçilərini unudur. Habelə Ermənistanın İslam dünyasına çıxışına maneələr yaradılmır.
Bu baxımdan Nikol Paşinyanın Misir səfərini xatırlaya bilərik. Səfərin Ermənistan üçün İslam və ya ən azı ərəb dünyasına etibarlı “pəncərə” açdığını söyləmək mübaliğə olardı. Lakin müəyyən mənada qeyd edə bilərik ki, Ermənistanın guya Qəzzaya humanitar yardım çatdıracağı ilə bağlı verdiyi açıqlamalar İranı “cilovlayır”. Rəsmi Tehran isə İslam Respublikası statusunu unudur, idologiyasını xarici ambisiyalarına qurban verir.
Firuz Bağırov
Ordu.az
