Ordu.az xəbər verir ki, təlim zamanı MQ-28 “Ghost Bat” PUA-sı ABŞ və müttəfiq ölkələrin hava vasitələri ilə birgə əməliyyatlar həyata keçirəcək.

Sistem İnsanlı-İnsansız Komanda İş Birliyi (MUM-T) və “Collaborative Combat Aircraft” (CCA) konsepsiyalarının inkişafına töhfə vermək məqsədi daşıyır.

“Valiant Shield 2026” təlimi çərçivəsində MQ-28 “Ghost Bat” pilotlu döyüş təyyarələri ilə koordinasiyalı şəkildə fəaliyyət göstərəcək və həm hücum, həm də müdafiə xarakterli hava əməliyyatlarında iştirak edəcək.

Təlimin gələcəyin hava döyüşü konsepsiyaları üçün taktika, texnika və prosedurların inkişafına töhfə verməsi planlaşdırılır.

ABŞ Hərbi Hava Qüvvələrinin Eksperimental Əməliyyatlar Birliyinin CCA bölməsinin rəhbəri mayor Daniel Peşiç bildirib ki, gələcəyin hava gücü peşəkar heyətlə onları gücləndirən texnologiyaların əməkdaşlığına əsaslanır.

Onun sözlərinə görə, insan-maşın əməkdaşlığının inkişafı qüvvələrin imkanlarını artırır və daha dayanıqlı, daha bacarıqlı və daha öldürücü birgə qüvvə yaradır.

ABŞ Hərbi Hava Qüvvələri və tərəfdaşları təlim zamanı MQ-28-in güc multiplikatoru kimi verə biləcəyi üstünlükləri təhlil edəcəklər.

Qiymətləndirmələr zamanı platformanın pilotlu döyüş təyyarələrinin fəaliyyət radiusunu, situasiya məlumatlılığını və sağqalma qabiliyyətini nə dərəcədə artırdığı araşdırılacaq.

Yarıavtonom xüsusiyyətə malik olan CCA platformaları insan operatorlarının nəzarəti altında fəaliyyət göstərir.

ABŞ Hərbi Hava Qüvvələri vurğulayır ki, kritik qərarların qəbulunda insan amili prosesin ayrılmaz hissəsi olaraq qalacaq. İki ildən bir keçirilən “Valiant Shield” təlimi çoxsahəli əməliyyat mühitində birgə qüvvələrin inteqrasiyasını təmin etməyə yönəlib.

Təlim çərçivəsində dəniz, hava, quru və kiber məkan üzrə hədəflərin aşkarlanması, izlənməsi və nişan alınması kimi tapşırıqlar icra olunur.

Sevinc Əliyeva
Ordu.az