Ordu.az xəbər verir ki, bu barədə peyk görüntülərinin təhlili əsasında məlumat yayılıb.

Təhlil nəticəsində mərkəzin əsas binasının damında yanıq izlərinin olduğu aşkarlanıb. Mütəxəssislərin qiymətləndirməsinə görə, həmin binada obyektin əsas idarəetmə və məlumat emalı sistemləri yerləşir.

Məlumata əsasən, binada server avadanlıqları, idarəetmə mərkəzi, əməliyyat məlumatlarının təhlili üçün əsas idarəetmə paneli və operator iş yerləri mövcuddur. Bundan əlavə, kompleksin digər mühüm binalarından birində də iri dəliyin əmələ gəldiyi müşahidə olunub. Həmin bina peyk rabitə mərkəzinin fəaliyyətində vacib rol oynayır.

Ukrayna Silahlı Qüvvələrinin Baş Qərargahı 2026-cı il iyunun 22-də “Dubna” Peyk Rabitə Mərkəzinə zərbə endirildiyini açıqlamışdı. Moskva vilayətində yerləşən obyekt Rusiyanın ən böyük, Avropanın isə ən iri peyk rabitə mərkəzlərindən biri hesab olunur.

Mərkəz Rusiya ərazisində və onun hüdudlarından kənarda peyk rabitəsinin idarə olunmasını təmin edir, həmçinin dövlət və kommersiya televiziya yayımının əsas paylama qovşaqlarından biri kimi fəaliyyət göstərir.

Obyekt ikili təyinatlı funksiyaya malikdir və həm mülki, həm də hərbi-təhlükəsizlik tapşırıqlarını yerinə yetirir.

Bildirilir ki, Ukrayna Müdafiə Qüvvələri mərkəzin digər elementlərini də hədəfə alıb. Belə ki, 2025-ci il sentyabrın 10-da reaktiv mühərrikli PUA-lar obyektin qərargah binalarına və rabitə qovşağına zərbələr endirib.

Bu sistem orbital qruplaşmadan daxil olan məlumatları toplayır, digər regionlardan gələn informasiyalarla müqayisə edir, ölçmə dəqiqliyini və koordinatları dəqiqləşdirir.

Mərkəz eyni zamanda Rusiya hərbi aviasiyasının naviqasiya sistemində mühüm rol oynayır. Onun fəaliyyəti olmadan uçuş əməliyyatlarının həyata keçirilməsi daha çətinləşir.

Bundan əvvəl 2025-ci ilin avqust ayında Krımdakı analoji mərkəzə də zərbə endirilmişdi. Həmin hücum zamanı “Prymary” xüsusi bölməsinin PUA-ları RT-70 radioteleskopunu və bir neçə “Utes-T” radiolokasiya stansiyasını vurmuşdu.

Sevinc Əliyeva
Ordu.az