Ordu.az xəbər verir ki, bu barədə ABŞ mətbuatı məlumat yayıb.
Qubernatorlar bildiriblər ki, F-35 istehsal tempinin qorunması ABŞ-nin hava üstünlüyünün saxlanılması, müttəfiqlərin ehtiyaclarının ödənilməsi və müdafiə sənayesi infrastrukturunun dayanıqlılığı baxımından mühüm əhəmiyyət daşıyır.
Konqresə göndərilən məktublarda proqram üçün çoxillik satınalma səlahiyyətinin təsdiqlənməsi də tələb olunub.
Qubernatorların fikrincə, bu yanaşma istehsal xərclərini azaltmaqla yanaşı, müdafiə sənayesinə uzunmüddətli sifariş perspektivi yaradacaq və təchizat zəncirinin möhkəmlənməsinə töhfə verəcək.
Texas ştatının qubernatoru Qreq Abbott bildirib ki, F-35 hazırda ABŞ-də istehsal olunan yeganə beşinci nəsil qırıcıdır.
“Fort-Uort şəhərində istehsal edilən F-35 ABŞ-də istehsal olunan yeganə beşinci nəsil görünməz qırıcıdır. O, qabaqcıl texnologiyaları sayəsində geosiyasi rəqiblərimizə qarşı çəkindirmə yaradır, eyni zamanda ölkə üzrə yüksək ixtisaslı istehsal və mühəndislik sahələrində minlərlə iş yeri formalaşdırır”, - deyə Abbott qeyd edib.
Ohayo ştatının qubernatoru Mayk DeVayn isə bildirib ki, F-35 ABŞ Hərbi Hava Qüvvələri, Hərbi Dəniz Qüvvələri və Dəniz Piyada Korpusu üçün strateji əhəmiyyət daşıyır.
Onun sözlərinə görə, Müdafiə Nazirliyinin F-35 istehsalını yenidən artırması ABŞ-nin həm hava, həm də sənaye üstünlüyünü uzun illər qoruyub saxlaması üçün vacibdir.
Qubernatorlar vurğulayıblar ki, F-35 proqramı yalnız hərbi imkanları gücləndirmir, eyni zamanda iqtisadiyyata da ciddi töhfə verir.
Qreq Abbott bildirib ki, proqram təkcə Texas ştatında 49 min nəfərin məşğulluğunu təmin edir və hər il iqtisadiyyata 10 milyard dollardan artıq töhfə verir.
Ohayoda isə proqramın 391 şirkəti və 15 mindən çox əməkdaşı dəstəklədiyi, ştat iqtisadiyyatına ildə təxminən 2,9 milyard dollar əlavə dəyər qazandırdığı qeyd olunub.
Arizona, Corciya, Oreqon, Cənubi Karolina və Şimali Karolina ştatlarının qubernatorları da öz ştatlarında həyata keçirilən istehsal, hazırlıq və texniki xidmət fəaliyyətlərinin F-35 proqramının ayrılmaz hissəsi olduğunu bildiriblər.
Qubernatorlar Konqresi Pentaqonun əlavə 85 ədəd F-35 alınması ilə bağlı müraciətini tam həcmdə maliyyələşdirməyə çağırıblar.
Birgə bəyanatda qeyd olunub ki, bu istehsal səviyyəsi hərbi qulluqçuların ehtiyaclarının qarşılanması və F-35-in ABŞ və müttəfiq ölkələrin hərbi hava qüvvələrinin əsas platformalarından biri olaraq qalması üçün həlledici əhəmiyyət daşıyır.
Məktublarda həmçinin vurğulanıb ki, F-35 proqramı ötən il 191 təyyarənin təhvil verilməsi ilə istehsal yetkinliyini və uzunmüddətli bazar tələbatını bir daha nümayiş etdirib.
Sevinc Əliyeva
Ordu.az
