Ordu.az xəbər verir ki, bu müqavilə Almaniya Silahlı Qüvvələri (Bundeswehr) üçün indiyədək verilmiş ən böyük H145M sifarişi hesab olunur.
2023-cü ilin dekabrında imzalanmış müqavilə 62 dəqiq sifariş və 20 opsiyadan ibarət olmaqla çoxməqsədli H145M helikopterlərini əhatə edirdi. “Airbus” seçim hüququnun da qüvvəyə mindiyini və bütün parkın artıq tam təsdiqləndiyini açıqlayıb.
Yenilənmiş bölgüyə əsasən, Quru Qoşunları 72, Hərbi Hava Qüvvələrinin xüsusi təyinatlı bölmələri isə 10 helikopter alacaq.
“Airbus” müqavilənin imzalanmasından bir ildən az müddət sonra ilk H145M LKH helikopterini 2024-cü ilin noyabrında Donauvert zavodunda təhvil verib və həmin vaxtdan etibarən çatdırılmalar davam edir.
Helikopterlər təlim, kəşfiyyat, xüsusi təyinatlı əməliyyatlar və yüngül hücum tapşırıqlarında istifadə olunacaq.
Təlim konfiqurasiyasındakı ilk helikopter Quru Qoşunlarının Bükeburq bazasına yerləşdirilib. “Bundeswehr” pilotlarının hazırlığı proqramda nəzərdə tutulan qrafikdən əvvəl, 2024-cü ilin avqustunda başlayıb. Yüngül hücum konfiqurasiyasında ilk təhvil isə müqaviləyə uyğun olaraq 2025-ci ildə həyata keçirilib.
Müqaviləyə yeddi illik texniki dəstək və xidmət paketi də daxildir. Eyni zamanda bu, “Airbus” tərəfindən hazırlanmış “HForce” silah idarəetmə sistemi üzrə indiyədək verilmiş ən böyük sifariş hesab olunur.
“Airbus Helicopters Germany” şirkətinin baş direktoru Ştefan Tome bildirib ki, Bundeswehr-in etibarlı tərəfdaşı olaraq qalmaqdan məmnundurlar.
“İlk H145M LKH-ni müqavilənin imzalanmasından bir ildən az müddətdə təhvil verməyimiz öhdəliyimizə sadiq olduğumuzu göstərir. H145M LKH Almaniya Silahlı Qüvvələrinin kritik tapşırıqlarını dəstəkləyən həqiqi çoxməqsədli platforma olacaq”, - deyə o qeyd edib.
H145M müxtəlif tapşırıq dəstləri arasında bir neçə dəqiqə ərzində yenidən konfiqurasiya edilə bilən çoxməqsədli hərbi helikopterdir.
Platforma idarəolunan və ballistik silahlarla təchiz edilmiş yüngül hücum konfiqurasiyasından, sürətli enmə avadanlıqlarına malik xüsusi əməliyyat konfiqurasiyasına keçə bilir. Tapşırıq paketlərinə həmçinin yükqaldırıcı kran və xarici yükdaşıma imkanları da daxildir.
Helikopter tam rəqəmsal mühərrik idarəetmə sisteminə (FADEC) malik iki ədəd “Safran Arriel 2E” mühərriki ilə təchiz olunub. Platformada dörd oxlu avtomatik pilotu özündə birləşdirən Helionix rəqəmsal avionik sistemi quraşdırılıb ki, bu da pilotun iş yükünü əhəmiyyətli dərəcədə azaldır.
Standart konfiqurasiyada istehsal olunan H145M helikopterləri “HForce” silah idarəetmə sisteminin daimi avadanlığı ilə təchiz edilir. Bu, pilotlara döyüş əməliyyatlarında istifadə olunan eyni platformada təlim keçmək imkanı yaradır və əlavə tip hazırlığına ehtiyacı aradan qaldırır.
H145M sınaqdan çıxmış iki mühərrikli H145 helikopterinin hərbi versiyasıdır. H145 ailəsi dünya üzrə təxminən 8 milyon uçuş saatına çatıb.
“Bundeswehr” hazırda xüsusi təyinatlı əməliyyatlar və axtarış-xilasetmə tapşırıqları üçün 24 H145 helikopterindən istifadə edir. ABŞ ordusu isə UH-72 “Lakota” adı altında bu ailəyə məxsus təxminən 500 helikopteri 1,5 milyon saatdan çox istismar edib.
H145M ailəsinin digər operatorları arasında Macarıstan, Serbiya, Lüksemburq, Tailand, Ekvador və Honduras yer alır. Son sifarişlər Cənubi Kipr (6), Belçika (17) və Bruney (6) tərəfindən verilib. Belçika ilk H145M helikopterini 2026-cı ilin iyununda təhvil alıb.
“Bundeswehr” vahid helikopter parkı üzərində qurulan təlim və əməliyyat modelini tətbiq etməklə çəkindirmə imkanlarını və döyüş hazırlığını artırmağı hədəfləyir. 82 helikopterlik tədarük Almaniyanın yüngül hücum və xüsusi təyinatlı hava dəstəyi imkanlarını əhəmiyyətli dərəcədə genişləndirəcək.
Sevinc Əliyeva
Ordu.az
